[A:༤༡༡]བཞིན་སྡོམ་བརྩོན་སྔགས་ཀྱང་འགྲུབ། །ཅེས་པ་ཆོས་འབྱུང་མང་པོར་སློབ་དཔོན་ཆོས་གྲགས་ལ་འཆད་པ་ཆོས་ཀྱི་སྐད་དོད་དྷརྨའི་ཟུར་ནི་གཉིས་ཀར་ཚང་བ་དང་བསྟན་པ་ལ་རབ་ཏུ་བྱུང་བའི་སྡོམ་བརྩོན་ཡིན་པར་མཚུངས་ནའང་ཆོས་གྲགས་ཀྱིས་ཚད་མ་རིགས་པས་རྒོལ་བ་ཚར་བཅད་པ་དེ་འདྲ་བའི་པཎྜི་ཏ་ནི་ཆེས་མང་ལ། བརྟུལ་ཞུགས་སྤྱོད་པའི་རྫུ་འཕྲུལ་གྱིས་ལོག་ལྟ་བཅོམས་པ་བསམ་གྱིས་མི་ཁྱབ་པའི་མཛད་པ་དང་སྐུ་ཚེ་དེ་ལ་མཆོག་གི་དངོས་གྲུབ་བརྙེས་པ་དཔལ་ལྡན་ཆོས་གྲགས་ལ་མ་བྱུང་བས་འཁྲུལ་པ་འོང་དོན་མེད་ཅིང༌། གྲུབ་ཐོབ་ཐམས་ཅད་ཀྱི་འཁོར་ལོ་སྒྱུར་བ་ནི་སློབ་དཔོན་འདི་ཉིད་དོ།། ༈ གཉིས་པ་སྠ་བི་ར་ནི་ཤིང་སྦྲུལ་འདར་དུ་ཞལ་གྱི་གཏོར་ཆེན་སྐབས་ཚར་ཆེན་རང་གི་མནལ་ལམ་དུ་གསལ་བ་བཞིན་རྡོ་རྗེ་གདན་གྱི་ནུབ་ཕྱོགས་ན་ངེས་གསང་རྡོ་རྗེ་ཐེག་པའི་ཆོས་ཀྱི་འབྱུང་གནས་ཨཽཌྜི་ཡ་ན་ཞེས་ཡུལ་དེའི་སྐྱེ་བོ་རྣམས་འཕུར་ནས་འགྲོ་བའི་མ་དང་མཁའ་འགྲོ་འདུ་བའི་ཡུལ་ཁྱད་པར་ཅན་དེར་སྐུ་བལྟམས་པ་ན་འཚོད་གཞོན་ནུའི་དུས་རྗེ་བཙུན་རྡོ་རྗེ་བཙུན་མོ་མཁའ་ལ་སྤྱོད་པའི་དབང་མོས་རྗེས་སུ་བཟུང་སྟེ་ལུང་བསྟན་ནས་གཟེངས་བསྟོད། མདོ་རྒྱུད་ཀྱི་གཞུང་ལ་སྐྱེས་ཐོབ་ཀྱི་ཤེས་རབ་དང་སྦྱོར་བྱུང་གི་བརྩོན་འགྲུས་ཀྱིས་གནས་ལྔ་མཁྱེན་པའི་པཎྜི་ཏའི་རྩེར་སོན་བསྟན་པའི་རྩ་བ་སོ་སོ་ཐར་པའི་བསླབ་པ་ལ་གཙོ་བོར་མཛད་པས་མཚན་སྠ་ཝི་ར་སྟེ་གནས་བརྟན་དུ་གྲགས། རྒྱ་གར་རྡོ་རྗེ་གདན་གྱི་མཁན་པོར་གྱུར་ཏེ་རྒྱལ་བའི་བསྟན་པ་ཆོས་སྤྱོད་རྣམ་བཅུའི་སྒོ་ནས་ཉམས་པ་གསོ་བ་དང་སྔར་ཡོད་རྣམས་དར་རྒྱས་སུ་མཛད་པར་བརྟེན་པཎ་གྲུབ་ཀུན་གྱི་གཙུག་ཏོར་གྱི་རྩེ་མོར་འཛེགས་