[A:༥༢༦]ལ། ཁྱད་པར་རྗེ་བཙུན་ས་སྐྱ་པའི་གསེར་ཆོས་རིག་བྱེད་མའི་ཆོས་སྐོར་ན་ཆར་དབབ་པའི་མན་ངག་ཆེས་ཟབ་པ་དངོས་སུ་ཕྱག་ལེན་མ་མཛད་ནའང༌། རྗེ་བཙུན་བཅོམ་ལྡན་འདས་མས་རྗེས་སུ་བཟུང་བའི་བྱིན་རླབས་ཀྱི་མཐུ་དང་ངེས་པའི་དོན་དུ་རླུང་སེམས་ལ་དབང་འབྱོར་པའི་གྲུབ་པའི་དབང་ཕྱུག་ཆེན་པོ་རྣམས་ཕྱི་ནང་རྡོ་རྗེའི་ལུས་ལ་གནད་དུ་བསྣུན་པས། །ཇི་ལྟར་ཕྱི་རོལ་དེ་བཞིན་ནང༌། ཞེས་པ་ལྟར་ནང་གི་ཏིང་ངེ་འཛིན་གྱིས་ཕྱི་རོལ་གྱི་ཆོས་རྣམས་བསྒྱུར་དུ་བཏུབ་པའི་གནད་གསང་ཆེན་པོར་མངོན། ལམ་ཡིག་ལས། སང་ཉིན་སྔ་བར་ཆས་ནས་ལྕགས་ལ་ཞེས་བྱའི་ལ་བརྒལ་ནས་རིམ་པར་བརྒྱུད། ལྕགས་ཐང་གི་མདའ་ཕྱུག་པོ་ཤར་བ་ཟེར་བའི་ཁྱིམ་བདག་དད་པ་ཅན་ཞིག་གི་ལྕང་ར་ཀླུ་སྡིངས་ཞིག་འདུག་པར་བསྡད། དེར་ཟླ་བ་ཡར་ངོའི་ཚེས་བཅོ་ལྔ་རྗེ་བླ་མའི་ཚེས་མཆོད་ཀྱི་སྐབས་སུ་བབ་བྱུང་བས། བླ་མ་མཆོད་ཆོག་རྒྱས་པར་བྱས་སྦྱིན་བདག་དེས་ཀྱང་བསྙེན་བཀུར་འབུལ་བ་སོགས་ཡང་དག་བྱུང༌། སང་ཚ་བའི་སྟེང་དུ་བླ་མ་ཞང་དགོན་པ་བའི་སྒྲུབ་གནས། རྗེ་བཙུན་ས་སྐྱ་པ་ཆེན་པོའི་གསུང་ངག་རིན་པོ་ཆེ་གསན་པའི་ཡུལ་སག་ཐང་དིང་ཞེས་བྱ་བར་སླེབ། དེའི་གཙུག་ལག་ཁང་མཆོད་རྟེན་ཆོས་ཁྲི་དང་བཅས་པ་མཇལ། ཕྱག་མཆོད་སྨོན་ལམ་གསོལ་གདབ་བྱས་ཏེ། དཔལ་ཇོ་མོ་ནང་གི་རི་ཁྲོད་ཆེན་པོར་སླེབ། དེའི་ནུབ་སྐུ་འབུམ་ཐང་དུ་ལྕོག་གྲ་བྱས་བསྡད་པས། དེར་གནས་མཇལ་ལ་འོངས་བའི་ཕྱོགས་ཀྱི་སྐྱ་སེར་ཕོ་མོ་མང་པོ་འདུག་པ་རྣམས་ཀྱིས། ངེད་དཔོན་སློབ་ལ་སྟོན་མོ་དག་སྣང་སྐོར་བ་ཆོས་འབྲེལ་ཞུ་བ་སོགས་མང་པོ་བྱུང༌། སང་སྔ་དྲོ་སྐུ་འབུམ་མཐོང་གྲོལ་ཆེན་མོ། སྦྱོར་དྲུག་བརྒྱུད་པའི་ལྷ་ཁང་