[A:༥༢༧]སོགས་མཇལ། རི་ཁྲོད་ལ་རྒྱང་བལྟས་བྱས་པས་བློ་འགྲོ་ཞིང་ཡིད་འཕྲོག་པ། སྔོན་གྱི་དམ་པ་རྣམས་ཀྱིས་འདི་ལྟ་བུའི་གནས་སུ་སྒྲུབ་གྲྭའི་རྒྱུན་བཙུགས། སྐྱེ་བོ་མང་པོ་ཐར་པའི་ལམ་ལ་འགོད་པར་མཛད་པ་ཆེས་ཆེར་ངོ་མཚར་ཞིང་རྨད་དུ་བྱུང་བའི་རྣམ་ཐར་དུ་འདུག །ཁོ་བོ་ཅག་ཀྱང་འདི་ལྟ་བུའི་དབེན་གནས་ཞིག་ཏུ་བྱང་ཆུབ་སྒྲུབ་པ་ཞིག་ནམ་འོང་སྙམ་པ་སྙིང་གི་དཀྱིལ་དུ་ལྷང་ལྷང་བའི་དག་སྣང་བྱུང་ངོ༌། །ཨེ་མ་ནགས་རྒྱལ་སྨན་བཙུན་དབང་མོའི་རི། །རི་ངོས་ཚང་ཚིང་འཁྲིགས་པའི་ནགས་ཀྱི་ཁྲོད། །ཁྲོད་ཡངས་རྡོ་བའི་སྤྱིལ་ཆུང་སྐྱིད་པའི་ནང༌། །ནང་དེར་བྱང་ཆུབ་སྒྲུབ་པའི་སྐལ་བཟང་ཚོ། །མཐོང་བའི་མོད་ལ་ཡིད་ནི་ཟ་ཟིར་གྱུར། །བདག་ཀྱང་ནམ་ཞིག་འདི་འདྲའི་སྐལ་བཟང་ཞིག །ཅིས་ཀྱང་སྒྲུབ་སྙམ་སྙིང་གི་གསེབ་དབྲག་ཏུ། །འགྱུར་མེད་དམ་བཅའི་ཕུར་པ་བརྟན་པོར་ཐེབས། །དེ་ནས་མདའ་སྐོར་བྱས་ཞེས་བྱུང༌། །གསོལ་འདེབས་ལས། གནོད་སྦྱིན་དབང་པོའི་གནས་སུ་མཆོད་གཏོར་ཕུལ། །བླ་ལུང་རི་བོར་འཁྲུལ་ཞིག་བླ་མ་མཇལ། །མཁས་གྲུབ་དབང་པོ་ཀུན་དགའ་ལེགས་པ་ལ། །ཟབ་མོའི་དབང་མཆོག་གསན་ལ་གསོལ་བ་འདེབས། །ཞེས་པའི་དོན་ལམ་ཡིག་ལས། བྲག་རམ་ཆོས་སྡེའི་མགོན་ཁང་མཇལ། གནོད་སྦྱིན་ཆེན་པོ་ལ་སྙན་དར་གསོལ་མཆོད་འཕྲིན་བཅོལ་དང་བཅས་པ་རྒྱས་པར་བྱས། བྲག་རམ་སློབ་དཔོན་པས་གདན་དྲངས། ཇ་འདྲེན་རས་དཀར་གྱི་ཕྱག་རྟེན་དང་བཅས་པ་ཕུལ། གནོད་སྦྱིན་གྱི་ཆོས་སྐོར་ཞུ་བའི་སྙན་གསན་ཕབ། རྗེས་སུ་དེ་ལྟར་བྱེད་པ་ཁས་བླངས། དེ་དང་ཁད་ཉེ་བའི་ཆུ་མོ་ལུང་གི་དགོན་པ་ན་གྲུབ་པ་མཆོག་གི་དབང་