[A:༥༢༥]བཏུང་བ་དབྱར་གྱི་ཆུ་མཚོ་ལྟར་ཆལ་ཆིལ་དུ་ལོངས་སྤྱོད་ཅིང་གནས་པའི་ཚེ། དེའི་དགོན་པར་ཆོས་རྗེའི་དྲུང་གིས་ངེད་དཔོན་སློབ་འགའ་གདན་དྲངས་གཞིས་ལེན་ཤངས་ལེན་བཟབས་མ་མཛད། ནང་སོ་དང་སྔར་འདྲིས་ཀྱི་གྲྭ་པ་རྣམས་ཀྱིས་ཀྱང་ཇ་འདྲེན་སོགས་ལེགས་ཚོགས་ཀྱི་རྟེན་འབྲེལ་ཐོག་མར་འགྲིག་པ་བྱུང༌། དེ་སྔ་ཡན་ཆར་དཀོན་ཙམ་ཡོད་པ་ལ། དེ་རྗེས་ངེད་དཔོན་སློབ་རྣམས་སོ་སོར་དགོངས་ཐུན་གྱི་རིམ་གཉིས་ཀྱི་རྣལ་འབྱོར་ལ་འཇུག་པར་རྩོམ་པ་ན། ཕྱོགས་ཐ་གྲུ་ནས་ཆར་སྤྲིན་དལ་བུ་གཏིབས། འབྲུག་སྒྲ་ཟབ་མོའི་སྒྲ་དབྱངས་དང་བཅས་པའི་ཆར་གྱི་ རྒྱུན་ཆེན་པོ་བབས་པས། འབྲུ་བཅུད་རྣམས་རབ་ཏུ་སོས་ཤིང་སྐྱེ་བོ་རྣམས་ཡིད་དགའ་བདེས་འཚོ་བར་གྱུར་ཏོ། །བྷུ་སུ་ཀུ་དེ་ལམ་དུ་ཆས་པའི་ཚེ། །དེ་ཡི་གཙུག་རྒྱན་རྗེ་བཙུན་ཁའུ་པའི། །ཐུགས་རྗེའི་དགེ་མཚན་འོད་ཟེར་སྟོང་འཕྲོས་པས། །རྒྱ་མཚོའི་ཀླུ་རྣམས་དགའ་བའི་ཟློས་གར་ལས། །ཕྱོགས་ཀུན་ཆར་སྤྲིན་གསར་པས་ཆེད་དུ་གཏིབས། །སྤྲིན་རུམ་ནང་ནས་འབྲུག་སྒྲ་དལ་གྱིས་རྒོད། །གློག་འབྲིང་གཞོན་ནུའི་གོ་སྐབས་དབྱེ་བ་ཡི། །ཡིད་བཞིན་སྤོས་ཆུའི་ཆར་ཆེན་དེང་འདིར་བབས། །ལོ་ཏོག་རྩི་ཤིང་ཉི་གཞོན་གྱིས་ཕྱེ་བའི། །པདྨོ་ཇི་བཞིན་ཕྱོགས་བཅུར་འཛུམ་དཀར་གཡོ། །མི་རྣམས་སྦྲང་རྩིས་མྱོས་པའི་བུང་བ་བཞིན། །རབ་ཏུ་དགའ་བའི་དར་དིར་གླུ་དབྱངས་ལེན། །ཞེས་བཀའ་སྩལ་པས་ཆར་རྒྱུན་གྱིས་འཛིན་མ་རྣམས་བརླན་ཏེ་མྱུ་གུའི་འཚོ་བ་སྐྱེད་བསྲིང་བའི་སྔོན་འགྲོའི་རྟེན་འབྲེལ་འགྲིག་པའང་སྤྱིར་དམ་པ་འདི་གང་དུ་བྱོན་པའི་སར་ཡུལ་ཁམས་བདེ་ཞིང་བཀྲ་ཤིས་པར་འབྱུང་བ་ཆོས་ཉིད་ཡིན་