[A:༥༢༠]མིག་གསུམ་མེ་ཡིས་ལོག་འདྲེན་འདོད་ལྷའི་ལུས། །རབ་བསྲེག་ལེགས་ལྡན་མགྲིན་སྔོན་རལ་པའི་རྩེར། །དབང་ཆུའི་བརྒྱུད་པ་ཆད་མེད་ཚེས་ཞག་ཏུ། །འཆར་བའི་ཟླ་ཟེར་ཕན་བདེའི་ཀུནྡ་བཞད། །ལུང་རྟོགས་རིན་ཅེན་མི་འཛད་འབྱུང་བའི་གཏེར། །ཟབ་རྒྱ་གཉིས་སྤངས་ཞབས་ཀྱི་རྣམ་པར་ཐར། །རྩོམ་པར་ལྷ་དང་མཁའ་འགྲོས་བརྡ་ཐབས་ཀྱིས། །བསྐུལ་བའི་སྒྱུ་འཕྲུལ་ངོ་མཚར་རྨད་པོ་ཆེ། །རྗེས་འབྲངས་ཉི་ཟླའི་འོད་སྣང་སྒྲ་སྐད་ཀྱིས། །མ་ཕྱེས་རྟོགས་བརྗོད་བ་ཀུ་ལ་ཡི་ཁ། དད་བརྩོན་མཁྱེན་རབ་མཛེས་མའི་འགྲམ་ཆང་གིས། །ཕྱེ་ཚེ་ལེགས་བཤད་ཟེའུ་འབྲུ་གཡུར་དུ་ཟ། །སྤྱོད་པའི་རྡོ་རྗེ་གཟུགས་གཞན་ཡོངས་བསྒྱུར་དང༌། །རྣལ་འབྱོར་དབང་ཕྱུག་བླ་གོས་མནབས་པ་གཉིས། །ཕན་ཚུན་དག་པ་འབྱམས་ཀླས་སྣང་བ་ཡིས། །ཐ་མལ་འཛིན་པའི་ཀུན་རྟོག་མིང་དུ་ཟད། །གསོལ་འདེབས་ལས། ཤར་ཕྱོགས་ནོར་འཛིན་ལམ་ལ་ཞབས་བཀོད་ཚེ། །རྣམ་དཀར་ཐོག་མའི་རྟེན་འབྲེལ་མཐའ་དག་འགྲིག །གྲུབ་པའི་གནས་མཆོག་སག་ཐང་ཇོ་ནང་སོགས། །རིམ་པར་ཞབས་ཀྱིས་བཅགས་ལ་གསོལ་བ་འདེབས། །ཞེས་སྒྱུར་བྱེད་ཅེས་པ་ས་མོ་ཕག་གི་ལོ་དགུང་ལོ་སོ་བརྒྱད་ཀྱི་དུས་ཡུལ་དབུས་སྨན་ལྗོངས་དགའ་བའི་ཚལ་གྱི་གཞི་ཆེན་པོར་ཞབས་ཟུང་འཁོར་ལོས་མཚན་པའི་རེ་ཁཱ་བཀོད་ནས་ལོ་གཉིས་ཙམ་གྱི་བར་དུ་བསྟན་འགྲོའི་དོན་རྒྱ་ཆེར་མཛད་པའི་སྐོར་གྱི་མང་མཁར་ནས་ཆིབས་ཁ་བསྐྱོད་དེ་འབྲས་ཡུལ་སྐྱེད་མོས་ཚལ་དུ་ཕེབས་པའི་བར་རང་གི་རྟོགས་བརྗོད་ལམ་གླུ་དཔྱིད་ཀྱི་རྒྱལ་མོའི་དགའ་སྟོན་ཞེས་ཚིག་དོན་ཕུན་སུམ་ཚོགས་ཤིང་བྱིན་