[A:༥༡༩]ཆབ་ཤོག་ཏུ་བྱུང་བའི་རྗོད་དོན་གྱིས་རྟོགས་པར་ནུས། དེ་ཡང་དུས་སྔ་ཕྱི་གསོལ་འདེབས་སུ་ཕྱོགས་བསྡེབས་ལས་རྣམ་ཐར་འདི་རྗེ་སྒོ་རུམ་པ་དག་ཞིང་དུ་གཤེགས་རྗེས་མཛད་པར་དངོས་སུ་བསྟན་པས་གཞན་ལའང་མཚོན་ནོ། །དགུང་ལོ་སོ་བརྒྱད་ཀྱི་བར་དུ་ཕལ་ཆེར་ཐུབ་བསྟན་དགེ་འཕེལ་དུ་སྟན་ཆགས་ཤིང་སྟོད་ཕྱོགས་ཀྱི་སའི་ཆ་ངེས་མེད་དུ་ཞབས་ཀྱིས་བཅགས་ཏེ་སྐྱ་སེར་འགྲོ་བ་མཐའ་ཀླས་པའི་རེ་འདོད་སྐོང་བཞིན་པ་ནས་ཕལ་ཆེར་ལྷ་སྔགས་ཡེ་ཤེས་ཀྱི་ཐུགས་དམ་ཟབ་མོའི་ངང་ནས། དབང་འཁྲིད་ལུང་མན་ངག་གིས་སྐལ་ལྡན་གྱི་སློབ་མ་རྗེས་སུ་འཛིན་པ་དང་བདག་ཆེན་རྡོ་རྗེ་འཆང་ཆེན་པོའི་རྣམ་ཐར་ཡིད་འཕྲོག་ཨུཏྤ་ལའི་དོ་ཤལ་སོགས་བསྟན་བཅོས་མཛད་པས་མཚོན་འཁོར་ལོ་གསུམ་གྱི་བསྟན་པ་སྤྱི་དང་བྱེ་བྲག་ཁའུ་པའི་རིང་ལུགས་ཕྱོགས་བརྒྱར་འཕེལ་བར་མཛད། མང་མཁའ་མུ་གུ་ལུང་དུ་སྐད་གཉིས་སྨྲ་བ་ལོ་ཆེན་འབྲོག་མིའི་སྐུ་འདྲ་རིན་པོ་ཆེ་མཇལ་བར་ཕེབས་པའི་དུས་སྐུའི་ཐུགས་ཀ་ནས་འོད་ཟེར་སྔོན་པོ་འཕྲོས་ཏེ་ཐུགས་ཀར་ཐིམ་པས་ཟག་མེད་ཀྱི་བདེ་བ་ཆེན་པོ་ལ་ཡུན་རིང་ཞིག་གི་བར་ཆམ་གྱིས་གནས་པར་གྱུར་ཏོ། །རིས་མེད་ཡིད་འགུགས་ཐུགས་རྗེ་མིག་གི་དཀྱུས། །རིང་ཡང་མོས་ལྡན་གཞོན་ནུའི་སེན་རྗེས་ཤུལ། །ལྷག་བསམ་ནུ་མར་འདུད་པའི་ཟླ་བཞིན་མར། །མངོན་འདོད་རྩེ་དགའ་གཏོང་མིན་དངོས་པོའི་གཤིས། །སློབ་བཤད་བདུད་རྩིར་སྤྱོད་འཁུའི་ལྷ་མིན་མགྲིན། །ལུང་རིགས་ཚངས་པའི་འཁོར་ལོས་རབ་ཕུག་ཀྱང༌། །ཐར་སྲོག་མི་ཆད་ཆ་མཐུན་ཟིལ་མངར་ཁོང༌། །སོང་འབྲས་ཨ་ཧོ་རྫོགས་མྱང་སྐལ་བཟང་དཔྱིད། །