[A:༥༢༡]རླབས་ཀྱི་གཟི་བྱིན་འོད་དུ་འབར་བའི་ཚིག་སྦྱོར་མ་ཉམས་པ་ལ་བར་སྐབས་སུ་གསོལ་འདེབས་དང་སྟོང་ཐུན་དགོས་ངེས་འདྲ་སྦྱར་བ་ནི་འདི་ལྟ་སྟེ། ན་མཿསརྦ་གུ་རུ་བུདྡྷ་བོ་དྷི་ས་ཏྭེ་བྷྱཿ ཕྱི་ལྟར་ན་ཕྱོགས་མེད་ཀྱི་བནྡེ། ནང་ལྟར་ན་གསང་ཆེན་གྱི་སྔགས་འཆང༌། གསང་བ་ལྟར་ན་རྗེ་བཙུན་རྡོ་རྗེ་འཆང་ཆེན་པོ་རྡོ་རིང་ཀུན་སྤངས་པ་ཞེས་ཡོངས་སུ་གྲགས་པ་དེའི་ཐུགས་གཉིས་སུ་མེད་པའི་ཡེ་ཤེས་དང༌། ཆོས་དབྱིངས་བདེ་བ་ཆེན་པོའི་ངང་དུ་རོ་གཅིག་ཀྱང༌། ཆོས་ཅན་གདངས་འགགས་མེད་ཀྱི་རོལ་རྩེད་ཐ་དད་དུ་ཤར་བ། རྗེ་དེ་ཉིད་ཀྱི་ཞབས་ཀྱི་པདྨ་གཙུག་གིས་བསྟེན་ཅིང༌། བཀའ་དྲིན་ཆེན་པོས་འཚོ་བའི་འཕྲིན་ལས་ཀྱི་འཁོར་ལོས་སྒྱུར་བའི་བཀའ་འབངས་རིག་སྔགས་འཆང་བའི་བནྡེ་བློ་གསལ་རྒྱ་མཚོ་གྲགས་པ་རྒྱལ་མཚན་དཔལ་བཟང་པོ། ད་ལྟ་མིང་ཡོངས་སུ་གྲགས་པ་ཚར་པ་ཆོས་རྗེ། དོན་ལ་ཅི་མེད་ཀྱི་བྷུ་སུ་ཀུ། ཡུལ་ཕྱོགས་མེད་དུ་རྒྱུ་བའི་སྤྲང་པོ་ཡིན་པ་བློ་བདེ་ཞེས་བྱ་བ་དེས། ཡུལ་འདར་སྟོད་མང་མཁར་གྱི་ཕོ་བྲང་དུ་སྐྱེ་བ་མེད་པ་ལ་སྐྱེ་བའི་ཆོ་འཕྲུལ་བསྟན། གྲུམ་སྟོད་ཁུའུའི་བྲག་ལ་སྒོམ་རྒྱུ་རྡུལ་ཙམ་མེད་པ་ལ་སྒོམ་པའི་རོ་མྱངས། རྒྱལ་ཁམས་ཕྱོགས་མེད་ཀྱི་བཞི་མདོར་རང་དོན་གྱི་དགོས་པ་ཅི་ཡང་མེད་བཞིན་དུ་ཉིན་མཚན་ཡད་ཡུད་དུ་འགྲོ་བའི་དགོས་དོན་མང་པོ་སྤྱོད་ཅིང་གནས་པ་ལས། བྱེ་བྲག་ཏུ་རང་ལོ་སུམ་ཅུ་སོ་བརྒྱད་ཡན་ལ་ཡུལ་དབུས་ཀྱི་སྨན་ལྗོངས་སུ་ལན་གསུམ་ཕྱིན་པའི་དང་པོ། རྗེ་བཙུན་འཇམ་པའི་དབྱངས་ཀྱི་རྣམ་པར་སྤྲུལ་པ་རྗེ་ངག་དབང་གྲགས་པའི་ཞབས་ཕྱིར་འབྲངས་ཏེ་ཕྱིན་ནས་ལོ་བརྒྱད་ཙམ་བསྡད། བར་པ་ལ་ས་སྐྱ་པའི་བསྟན་པའི་