[A:༥༡༨]ཀྱི་སྤྲོས་པ་བྱེད་ན་རང་གཞི་མེད་ཀྱི་རློམས་པར་འདུག་ལགས་ནའང༌། བཀའ་དྲིན་བདག་རང་ལ་ཆེ་བ་ཞིག་ལགས་ཏེ། བདག་བླུན་པོ་ལུག་བོང་ལྟ་བུ་འདི་དུས་ད་ལྟ་དམ་པའི་ཆོས་བྱེད་འདོད་དང་ཉམས་སུ་ལེན་ཚུལ་ཆ་ཙམ་ཤེས་པ། ལྟར་སྣང་མི་ཁྱུར་ཆུད་ཙམ་འདི་རྗེའི་བཀའ་དྲིན་ཁོ་ན་མ་གཏོགས་མེད་པས་བཀའ་དྲིན་དྲན་པས་བྱུང་རྒྱལ་དུ་བརྩམས་པ་ལགས་ནའང་ལེགས་འདུག་གསུང་བའི་མདོང་གསོལ་ཕེབས་པས་དམ་པ་ཉིད་ལྟ་བུས་གཡོ་སྒྱུ་དང་གཅམ་བུའི་ཟོལ་ཟོག་གསུང་བ་མི་སྲིད་པས། ཅུང་ཟད་མགྲིན་པའི་གཟེངས་བཏེག་ནས་རང་གིས་རང་ལ་ཐེ་ཚོམ་དུ་གྱུར་ལགས། སླད་ཀྱི་ཞུ་བ་སྐྱེ་རྒུ་རྣམས་ཀྱི་ཕན་བདེ་མཐའ་དག་རྒྱལ་བའི་བསྟན་པ་ཁོ་ན་ལ་རག་ལས་ལ་དེ་ཉིད་འཛིན་པ་ལ་དེང་སང་གངས་ཅན་གྱི་ལྗོངས་འདི་ན་མཁས་ཤིང་དངོས་གྲུབ་ཀྱིས་ཀྱང་བརྒྱན་པ་འཕྲིན་ལས་ཀྱི་ཐ་གྲུ་ཡངས་པ་སོགས་དགེ་མཚན་དུ་མས་མངོན་པར་མཐོ་བ་དམ་པ་ཁྱེད་ལྟ་བུར་མཆིས་པས་སྐུའི་འཚོ་བ་ཡུན་རིང་དུ་བརྟན་པའི་ཐབས་རྣམས་ལ་ཆེད་དུ་ནན་ཏན་དང་རིས་མེད་པའི་འགྲོ་བ་རྣམས་ལ་ཐུགས་བརྩེ་བ་ཆེན་པོས་ཟབ་པ་དང་རྒྱ་ཆེ་བའི་ཆོས་ཀྱི་འཁོར་ལོ་རྒྱུན་མི་ཆད་པར་བསྐོར་དུ་གསོལ། བདག་ཀྱང་སྐབས་སྦྱར་ཞལ་གྱི་དཀྱིལ་འཁོར་ལྟ་ཞིང་གསུང་གི་འབེལ་བའི་གཏམ་གྱི་བདུད་རྩི་མྱང་བར་སྙིང་ནས་སྨོན་ལམ་ཞུ་ཞིང༌། དེ་བར་དུ་དབེན་པའི་རི་སུལ་བསྟེན་ཚུལ་སོགས་ཀྱི་སྙིང་གཏམ་སྙན་ངག་གི་ལམ་ནས་དྲངས་པ་སྣང་བར་ཤར་ནའང་དགེ་སྦྱོར་གྱི་བོགས་འདོན་དུ་ཆེ་བ་ཞིག་འོང་སྙམ་པའི་དད་པ་དང་དག་སྣང་གཞན་དང་མི་འདྲ་བ་ཞིག་ཡོང་བའི་བཀའ་དྲིན་ཞུ་ཞུ། ཞེས་