[A:519]chab shog tu byung ba'i rjod don gyis rtogs par nus/ de yang dus snga phyi gsol 'debs su phyogs bsdebs las rnam thar 'di rje sgo rum pa dag zhing du gshegs rjes mdzad par dngos su bstan pas gzhan la'ang mtshon no/ /dgung lo so brgyad kyi bar du phal cher thub bstan dge 'phel du stan chags shing stod phyogs kyi sa'i cha nges med du zhabs kyis bcags te skya ser 'gro ba mtha' klas pa'i re 'dod skong bzhin pa nas phal cher lha sngags ye shes kyi thugs dam zab mo'i ngang nas/ dbang 'khrid lung man ngag gis skal ldan gyi slob ma rjes su 'dzin pa dang bdag chen rdo rje 'chang chen po'i rnam thar yid 'phrog utpa la'i do shal sogs bstan bcos mdzad pas mtshon 'khor lo gsum gyi bstan pa spyi dang bye brag kha'u pa'i ring lugs phyogs brgyar 'phel bar mdzad/ mang mkha' mu gu lung du skad gnyis smra ba lo chen 'brog mi'i sku 'dra rin po che mjal bar phebs pa'i dus sku'i thugs ka nas 'od zer sngon po 'phros te thugs kar thim pas zag med kyi bde ba chen po la yun ring zhig gi bar cham gyis gnas par gyur to/ /ris med yid 'gugs thugs rje mig gi dkyus/ /ring yang mos ldan gzhon nu'i sen rjes shul/ /lhag bsam nu mar 'dud pa'i zla bzhin mar/ /mngon 'dod rtse dga' gtong min dngos po'i gshis/ /slob bshad bdud rtsir spyod 'khu'i lha min mgrin/ /lung rigs tshangs pa'i 'khor los rab phug kyang / /thar srog mi chad cha mthun zil mngar khong / /song 'bras a ho rdzogs myang skal bzang dpyid/ /