[A:༥༡༧]ཟླ་ཤེལ་བཞུ་བའི་འོད། །སྙན་ཚིགས་བདུད་རྩིས་ཁེངས་པའི་ཟིལ་དངར་ཅན། །དཀར་གསལ་ཆུ་འཛིན་བུ་མོ་བཞད་ལྡན་མ། །ཞུ་འཕྲིན་དབྱར་སྐྱེས་རྫ་རྔ་འདི་སྐད་ཞུ། །ཨ་ཧོ་དྲིན་ཅན་བླ་མའི་ཐུགས་ཀྱི་སྲས། །བྱང་ཕྱོགས་འདི་ན་ནག་པོ་སྤྱོད་པ་ཞེས། །སྙན་པའི་གྲགས་དཀར་གཡོ་བའི་མཁས་གྲུབ་དབང༌། །དམ་ཚིག་རྡོ་རྗེའི་མཆེད་དེའི་བཀའ་ཡིག་གི །འཚམས་སྤྲིན་བློ་མཚོར་ཤར་བས་སྙིང་མྱོས་ཀྱང༌། །ཟླ་ཞལ་མཇལ་བའི་དགའ་སྟོན་མ་ཐོབ་པས། །སྙིང་ལ་ཁྱོད་སྐུའི་སྣང་བརྙན་འདྲི་བྱེད་ཅིང༌། །བསམ་གཏན་ཟོལ་གྱི་བདག་པོར་ངལ་གསོ་བགྱི། །ནམ་ཞིག་མཁས་པའི་ཟླ་རིས་གཞོན་ནུ་དེ། །འདྲེན་བྱེད་རི་བོའི་སྤོ་ལ་ཤར་བའི་ཚེ། །སྙིང་གི་ཀུ་མུད་འཛུམ་དཀར་བཞད་བྱེད་ཅིང༌། །ཟབ་དབྱངས་བདུད་རྩིའི་རྒྱུན་གྱིས་སིམ་པར་སྨོན། །སྐབས་ཀྱི་ཞུ་མཆིད་སྙིང་པོར་གསོལ་ན་གེ་རེ་ལྷ་ཁང་དུ་གནས་དུས། སྟོད་ལུང་ནས་བཀའི་གླེགས་བུ་སྐྱེས་བཅས་རྗེ་བླ་མའི་རྣམ་ཐར་རྣམས་ཕྱག་རྒྱས་མཚན་པ་ཕེབས་པས་དངོས་སུ་མཇལ་བ་ལྟ་བུའི་སྤྲོ་དགའི་བདུད་རྩི་གསར་པས་ཡིད་ཀྱི་ཆུ་གཏེར་ཅི་ཡང་གང་བར་གྱུར་ལགས། ཕེབས་དོན་གྱི་ཆ་ལ་བསམས་དུས་རྗེ་བཙུན་བླ་མ་རྡོ་རྗེ་འཆང་ཆེན་པོ་དེ་ཉིད་ལ་ཞལ་སློབ་སྔར་དག་པའི་ཞིང་དུ་གཤེགས་པ་འཇམ་དབྱངས་ངག་གི་དབང་ཕྱུག་རྗེ་བཙུན་ཀུན་དགའ་ལེགས་པའི་ཞབས་ལ་སོགས་པ་རྒྱལ་བའི་རྣམ་པར་འཕྲུལ་པས་འགྲོ་བའི་དོན་མཛད་པ་ཁོ་ན་ཡིན་སྙམ་པ་ཡོད་ཅིང༌། ད་ལྟའང་དམ་པ་ཉིད་ལྟ་བུ་མཁས་པ་དང་གྲུབ་པའི་བདག་ཉིད་ཇི་སྙེད་ཅིག་བཞུགས་བཞིན་དུ་བདག་ལྟ་བུ་རྣམ་ཐར་རྩོམ་པ་སོགས་