[A:518]kyi spros pa byed na rang gzhi med kyi rloms par 'dug lags na'ang / bka' drin bdag rang la che ba zhig lags te/ bdag blun po lug bong lta bu 'di dus da lta dam pa'i chos byed 'dod dang nyams su len tshul cha tsam shes pa/ ltar snang mi khyur chud tsam 'di rje'i bka' drin kho na ma gtogs med pas bka' drin dran pas byung rgyal du brtsams pa lags na'ang legs 'dug gsung ba'i mdong gsol phebs pas dam pa nyid lta bus g.yo sgyu dang gcam bu'i zol zog gsung ba mi srid pas/ cung zad mgrin pa'i gzengs bteg nas rang gis rang la the tshom du gyur lags/ slad kyi zhu ba skye rgu rnams kyi phan bde mtha' dag rgyal ba'i bstan pa kho na la rag las la de nyid 'dzin pa la deng sang gangs can gyi ljongs 'di na mkhas shing dngos grub kyis kyang brgyan pa 'phrin las kyi tha gru yangs pa sogs dge mtshan du mas mngon par mtho ba dam pa khyed lta bur mchis pas sku'i 'tsho ba yun ring du brtan pa'i thabs rnams la ched du nan tan dang ris med pa'i 'gro ba rnams la thugs brtse ba chen pos zab pa dang rgya che ba'i chos kyi 'khor lo rgyun mi chad par bskor du gsol/ bdag kyang skabs sbyar zhal gyi dkyil 'khor lta zhing gsung gi 'bel ba'i gtam gyi bdud rtsi myang bar snying nas smon lam zhu zhing / de bar du dben pa'i ri sul bsten tshul sogs kyi snying gtam snyan ngag gi lam nas drangs pa snang bar shar na'ang dge sbyor gyi bogs 'don du che ba zhig 'ong snyam pa'i dad pa dang dag snang gzhan dang mi 'dra ba zhig yong ba'i bka' drin zhu zhu/ zhes