[A:༥༡༤]དཔོན་ལྭ་བ་པའི་དུས་ཀྱི་ལ་བའི་དུམ་བུ་ཟ་མཁན་གྱི་མཁའ་འགྲོའི་གཙོ་མོ་པདྨའི་དྲ་བ་ཅན་ཡིན། གཞན་གཞོན་ནུ་ཞིག་ལ་མཛུབ་མོ་བསྟད་ནས་འདི་སེང་གེའི་དྲ་བ་ཅན་ཡིན། གཞན་འདི་རྣམས་ཕྱོགས་བཅུ་ནས་འདུས་པར་འདུག་ཟེར་དེ་རྗེས་གཉིད་སད་བསམས་པར་རྗེ་བླ་མ་ཕག་མོ་གྲུ་པའི་རྣམ་སྤྲུལ་ཡིན་པ་ནི་ངེས་པ་ཅན་དུ་འདུག་སྙམ་པ་བྱུང༌། དེ་ནས་ཞག་འགའ་སོང་བ་ན་ནུབ་གསུམ་བསྟུད་ནས་རྨི་ལམ་དུ་འདྲེ་མནན་གྱི་རྣམ་པ་ཡང་ཡང་དུ་འོང་བ་ཞིག་བྱུང་བས་འདི་འདྲའི་རིགས་ནེ་གུ་བ་རྣམས་རླུང་དབུ་མར་འཇུག་ཁ་མའི་འོད་གསལ་གྱི་རྟགས་སུ་བྱེད། མགོན་པོའི་རྒྱུད་དུར་ཁྲོད་ནག་པོ་ནས་གྲིབ་གནོན་ལྟ་བུར་འོང་བ་དང་ཞེས་ཆོས་སྐྱོང་གི་རྟགས་སུའང་བཤད། གང་ལྟར་དགེ་སྦྱོང་དུ་བསྲངས་པ་དྲག་སྙམ་པ་བྱས་པས་ནུབ་བཞི་པའི་རྨི་ལམ་དུ་སྔར་གྱི་བུད་མེད་དེ་བྱུང་ནས་ལག་ཏུ་སྣག་ཚ་ཐོད་པ་གང་དང་ལྕགས་སྨྱུག་ཅིག་གཏད་བྱུང་ནས་ངེད་རྣམས་ཀྱིས་གང་ལབས་ཀྱང་མི་གོ་བར་འདུག །མི་གཞན་གྱི་བླ་མའི་གྲྭ་པས་བླ་མའི་རྣམ་ཐར་འཆོས་ཀྱི་འདུག་ཟེར་བའི་འཕྲོ་ལ་གཉིད་སད་བྱུང་བས་ཁ་སང་ནས་ཀྱི་ལྟས་ཐམས་ཅད་འདིར་འདུག་པས་ད་སང་རང་ནས། རྗེའི་རྣམ་ཐར་རྩོམ་དགོས་སྙམ་པ་བྱས་ནམ་ལངས་དགེ་སྦྱོར་གྲུབ་ནས་གཉིད་ཟིར་ཙམ་བྱུང་བའི་རྨི་ལམ་དུ་ཆོས་ཁྲི་ཞིག་གི་སྟེང་ནས་བནྡེ་གཞོན་ནུ་ཞིག་གིས་སྐྱེས་རབས་དཔག་བསམ་འཁྲི་ཤིང་སྒྲོག་གིན་འདུག་པ་ཉན་མཁན་ཡིན་ཟེར་བུད་མེད་གཞོན་ནུ་མཆོར་མོ་མང་པོ་གླུ་ལེན་རྐང་བྲོ་བྱེད་ཀྱིན་འདུག་པ་རྨིས། སང་དེ་ནས་འགོ་བཙུགས་ནས་བརྩམས་པས་མ་གྲུབ་བར་ལ་རྗེ་བླ་མ་ལན་གསུམ་རྨིས།