[A:༥༡༣]འོང་ངམ་སྙམ་སྒུག་སྡོད་ཡུན་རིང་པོའི་ངང་དུ་གནས་ཀྱང་གྲུབ་པར་མ་ཐོས་པའི་མཚམས་སུ་ཡེ་ཤེས་ཀྱི་མཁའ་འགྲོ་རྣམས་ཀྱིས་ཅུང་ཟད་བསྐུལ་བའི་མཚན་ལྟས་ཀྱང་འདུག་ཅིང་གསུང་ངག་རིན་པོ་ཆེའི་བླ་མ་བརྒྱུད་པའི་རྣམ་ཐར་གྱི་ཁ་སྐོང་དང༌། སྐལ་བ་དང་ལྡན་པའི་གང་ཟག་དག་གི་རྒྱུད་ལ་ཡེ་ཤེས་ཀྱི་བྱིན་རླབས་འཇུག་པའི་མཚམས་སྦྱོར་དུ་ཞེས་བྱུང་བའི་ངོ་མཚར་བའི་ལྟས་ནི་གསུང་རྩོམ་ཕྱག་བྲིས་མ་ལས། ཟླ་བ་དང་པོ་ལ་སྐྱེས་ཕོ་མོ་མང་པོ་ཚོགས་ཏེ་སྒྲོན་མེ་ཁུར་ནས་རྡོ་རིང་ཀུན་སྤངས་པའི་གྲྭ་པ་རྣམས་གར་སོང་འཚོལ་བ་ཡིན་ཟེར་ནས་ཁོ་བོའི་མདུན་ཕྱོགས་སུ་ཡད་ཡུད་མང་པོ་བྱེད་པ་ལ། ལན་དུ་རྗེའི་གྲྭ་པ་འདི་དང་འདི་ཞེས་བྱ་བ་མང་པོ་ཡོད་ང་ཡང་ཡིན་བྱས་པས་འོ་ན་རྣམ་ཐར་བཤད་རྒྱུ་ཡོད་དམ་ཟེར་བ་ལ་མེད་པ་སྙམ་བྱེད་ཅིང་ཤིན་ཏུ་ངོ་གནོང་བ་ཞིག་ལ་གཉིད་སད་བྱུང་ནས་སེམས་མི་བདེ་བ་སྙམ་བྱེད་པ་འགའ་བྱུང༌། དེ་རྗེས་ཀྱི་ཟླ་བ་ཕྱི་མའི་ནང་དུ་ནུབ་ཅིག་རྨི་ལམ་དུ་བུད་མེད་སྣུམ་བག་ཅན་མང་པོ་བྲག་སྟེང་ཞིག་ན་ཚོགས་ཁུ་དིར་དིར་འདུག་པ་ལ་ལྟར་ཕྱིན་པས་དེ་རྣམས་ཐམས་ཅད་ཡི་གེ་འབའ་ཞིག་འདྲི་ཞིང་ཁ་མི་འཆམ་པའི་ཟི་རེ་བ་བྱེད་པ་ལ་དོན་གང་ཡིན་ལབས་པས། བུད་མེད་རྒན་མོ་བྱད་དམར་ཆམ་མེ་བ་སོ་འཛར་བ་ཞིག་ན་རེ། ངེད་རྣམས་ཁྱེད་ཀྱི་བླ་མའི་རྣམ་ཐར་རྩོམ་པ་ཡིན་ཟེར། ཁྱེད་རྣམས་ལ་རྒྱུས་ཡོད་དམ་བྱས་པས་པོ་ཏི་ཆེན་པོ་ཞིག་འདུག་པ་ལ་མཛུབ་མོ་བཙུགས་ནས་འདི་ཕག་མོ་གྲུ་པའི་རྣམ་ཐར་པོ་ཏི་ཡིན་འདིའི་ནང་ནས་འདྲི་བ་ཡིན་ཟེར། ཁྱེད་རྣམས་ག་ནས་ཡིན་བྱས་པས་ང་ནི་སློབ་