[A:༥༡༥] གཞན་ཡང་དགེ་བའི་ལྟས་མང་པོ་བྱུང༌། ཚར་ཁར་འདོད་ཁམས་ལྷ་མོ་ཡིན་ཟེར་བའི་བུད་མེད་བོང་བུའི་རྣ་བ་ཡོད་པ་ཞིག་གིས་གཙོ་བྱས་མང་པོ་བྱུང་ནས་འདི་ལ་བཀའ་བརྒྱ་ཞིག་ཀྱང་གྱིས་བསྟན་པ་ངེད་རང་གིས་བསྲུང་ཟེར་བ་བྱུང་ངོ༌། །ཞེས་དེ་ལྟར་འདོད་ཁམས་དབང་མོས་རྣམ་ཐར་གྱི་མཇུག་ཏུ་བཀའ་རྒྱས་ཐོབ་ཅེས་གསོལ་བ་ལ་བརྟེན་ནས། དེ་ཀའི་མཇུག་ཏུ། ཉི་གཞོན་འོད་ཀྱིས་པད་ཚལ་འབྱེད། །ཀུ་མུད་མེ་ཏོག་ཟུམ་པར་བྱེད། །འོ་མ་སྐྱེས་བུའི་འཚོ་བ་དེ། །བྲང་འགྲོའི་སྲོག་འཕྲོགས་ཧ་ལའི་བཅུད། །དེ་བཞིན་དམ་པའི་ངོ་མཚར་གཏམ། །སྐལ་བཟང་རྣ་བའི་ཨུཏྤལ་རྒྱན། །སྐལ་དམན་ལོག་རྟོག་ཅན་དག་གི །སྙིང་ལ་ཟུག་རྔུའི་བཅུད་ལེན་འགྱུར། །དེ་བས་གསང་ཆེན་གཏམ་འདི་ཡང༌། །དད་དང་དམ་ཚིག་ལྡན་པ་དང༌། །དཔྱོད་ལྡན་སྐལ་བཟང་གཟུར་གནས་ལ། །སྟོན་གྱིས་སྐལ་དམན་དག་ལ་མིན། །ཞེས་བཀའ་རྒྱ་མཛད་ཅིང་དཔལ་ལྡན་ལྷ་མོ་དུད་པའི་སོལ་བ་ཅན་འདི་ནི་རྡོ་རྗེ་འཆང་བློ་གྲོས་རྒྱལ་མཚན་ཡབ་སྲས་རྣམས་ལ་དངོས་སུ་ཞལ་བསྟན་ཅིང་གསུང་གི་གནང་བ་སྩོལ་བའི་སྲུང་མའི་དབང་མོ་ཁྱད་པར་ཅན་དུ་སྣང༌། རྟོགས་བརྗོད་འདི་ཉིད་གྲུབ་ནས་རྗེ་བཙུན་ཨ་ཝ་དྷཱུ་ཏཱི་པ་ཆེན་པོའི་སློབ་མའི་གཙོ་བོ་སྤྱོད་པའི་རྡོ་རྗེའི་རྣམ་འཕྲུལ་རྗེ་བཙུན་གྲོལ་མཆོག་ལ་གཟིགས་འབུལ་གནང་བའི་ལན་དུ། བློ་གསལ་མཁས་པའི་རྣམ་དཔྱོད་གསར་པའི་མདངས། །མཁྱེན་ཡངས་རྒྱ་མཚོའི་ལྕིབས་ཀྱི་དྲུང་ཕྱུང་སྟེ། །ངོ་མཚར་དད་པའི་སྤུ་ལོང་ཆེར་གཡོས་པས། །དམ་ཚིག་རྡོ་རྗེའི་མཆེད་པོ་གང་གི་