[A:༥༡༢]ལས་ཉོན་སྒྲིབ་པ་ཀུན་བྱང་ནས། །རྡོ་རྗེ་འཆང་དབང་མྱུར་འགྲུབ་ཤོག །ཅེས་སྨོན་ལམ་འདེབས་པ་གནང་ཞིང་ས་ཕྱོགས་གང་དུ་ཕེབས་པའམ་བཞུགས་ཀྱང་རུང་འབྱུང་པོ་མི་མ་ཡིན་མཐུ་བོ་ཆེ་མཐའ་དག་སྲོག་སྙིང་མདོང་གསོལ་དུ་ཕུལ་ནས་བཀའ་བཞིན་བསྒྲུབ། དགོན་པ་ཤར་སྦུག་ཏུ་ངག་དབང་ལྷ་མོ་དབྱངས་ཅན་མའི་ལྗགས་བསྙེན་མཛད་པའི་ཚེ་མེ་ཏོག་དཀར་པོའི་ཆར་འབབ་པ་དང་ཉེ་སྐོར་དུ་བརྡུང་མཁན་མེད་ཀྱང་པི་ཝང་གི་སྒྲ་སྙན་པོ་གསན་ཞིང་མཐར་ཞལ་མངོན་སུམ་དུ་བསྟན་ནས་ལུང་བསྟན་ཀྱང་ཐོབ། སྤྱིར་རིག་པའི་གནས་ལྔ་དང་བྱེ་བྲག་སྙན་ངག་ལ་ཐོགས་པ་མེད་པའི་རྣམ་དཔྱོད་ནི་སློབ་དཔོན་བསྟེན་ནས་ཡུན་དུ་སྦྱངས་ཀྱང་སྐམ་སྐམ་ཁྲིག་ཆགས་ཤིག་ལས་ཡོད་དཀའ་བར་ཐུགས་རྩོམ་གང་མཛད་སྙན་ངག་ཏུ་འགྲོ་བའི་བློ་གྲོས་ཀྱི་སྤོབས་པ་ནང་ནས་རྡོལ་བར་མངོན། ཐུབ་བསྟན་དགེ་འཕེལ་དུ་བཞུགས་པའི་དུས་རྡོ་རྗེ་འཆང་ཀུན་སྤངས་ཆོས་རྗེའི་རྣམ་ཐར་ཐུགས་རྩོམ་གནང་བའི་སྦྱར་བྱང་དུ་སྤྱིར་དམ་པ་འདིའི་རྣམ་ཐར་མཐའ་དག་ནི་སོ་སོ་སྐྱེ་བོའི་སྤྱོད་ཡུལ་མ་ཡིན་པར་གོང་དུ་བརྗོད་པ་དག་གིས་འགྲུབ་པ་དང་ཁྱད་པར་རྗེ་ཉིད་ཞལ་བཞུགས་དུས་གསོལ་བ་བཏབ་པའི་གསུང་ལས་ཀྱང་གྲུབ་ཐོབ་ཐང་སྟོང་རྒྱལ་པོ་དང་ངེད་དཔོན་སློབ་ཀྱི་རྣམ་ཐར་སུ་བྱུང་གི་བློ་ཡུལ་དུ་ཤོང་བ་མེད་གསུང་པས་བདག་ལྟ་བུ་བློ་གྲོས་ཆུང་ཞིང་སྦྱངས་པ་ཞན་ལ་བརྗེད་ངེས་པས་ཇི་ལྟ་བ་བཞིན་བརྗོད་ནུས་པའི་སྤོབས་པ་མ་མཆིས་ཤིང༌། ཞལ་སློབ་མཁས་པ་དང་གྲུབ་པའི་དབང་ཕྱུག་དུ་མ་བཞུགས་པ་རྣམས་ཀྱིས་མཛད་པ་འོས་སུ་འདུག་པས་མཛད་གྲུབ་པ་ཞིག་