[A:༥༡༡]ཏེ་སྨན་འདམ་ལས་གྲུབ་པའི་གུར་མགོན་མི་ཚད་ཙམ། ལྷ་མོ། ལས་མགོན་ཡབ་ཡུམ། པུ་ཏྲ་མིང་སྲིང༌། ཞལ་བྲམ་གཟུགས། བེག་ཙེ་ལྕམ་དྲལ་རྣམས་ཁྲུ་ཕྱེད་དོ་ཙམ། རྟག་གཏོར་འཛིན་གཏོར་སྤྱན་གཟིགས་སོགས་རྒྱས་ཤིང་ངོ་མཚར་བ་དང༌། དེའི་བཟོ་ཕུད་དུ་ལམ་འབྲས་དང་ལམ་ཟབ་བརྒྱུད་པ་རྐང་གང་ཙམ་ཁྱད་པར་རྗེ་ཉིད་ཀྱི་སྐུ་འདྲ་མི་ཚད་ཆུང་ཕྱོགས་ཙམ་བྱོན་གཙང་ཞིང་རབ་གནས་ཀྱི་སྐབས་ཤངས་གཡོན་གྱི་སྦུབ་ཏུ་རིང་བསྲེལ་ཡུངས་འབྲུ་ཙམ་གཉིས་བྱུང་བ། ཕྱིས་མཁན་ཆེན་རྒྱལ་རྩེ་བ་བྱམས་པ་ངག་དབང་བསོད་ནམས་རྒྱལ་མཚན་གྱིས་ཁྲུས་གསོལ་དང་མཆོད་པ་རྒྱས་པར་མཛད་སྐབས་སྙན་གཡོན་གྱི་ལྟག་ཏུ་རིང་བསྲེལ་ཆེ་ཙམ་གཉིས་གསར་དུ་འཁྲུངས་ཤིང་ད་ལྟའི་བར་དུ་སྐུ་གྲིབ་ཀྱི་རྣམ་པ་བྱུང་ཚེ་སྤྱན་གཡས་གཡོན་གྱི་འགུག་ནས་ཁྲག་མདའ་འདྲ་བའི་དམར་པོ་ཞིག་སྤྱན་འབྲས་ཀྱི་དཀྱིལ་ཙམ་སླེབ་པ་རྒྱུགས་ཡོང་ཞིང་དེ་ལ་ཁྲུས་གསོལ་བྱས་ན་སངས་འགྲོ་བའི་ངོ་མཚར་ཅན་ཡེ་ཤེས་སེམས་དཔའ་དངོས་སུ་བཞུགས་པའི་བྱིན་རླབས་ཆེ་ངེས། ཕྱིའི་ཆོས་ཁྲི། ལྷ་གཡབས། དེ་ནང་དུ་བཞུགས་རྒྱུར་མང་མཁར་ཆུ་ཚན་གྱི་ཕུའི་དོལ་མཐའི་གཞི་བདག་ལ་རྡོ་ལྷ་བཞེང་པའི་རྡོ་ཐོང་ཞེས་བཀའ་ཤོག་མཛད་པ་བསྒྲགས་པས་རྡོ་གང་འདོད་ལྡང་ཚོད་ཙམ་རྙེད་པའི་ངོ་མཚར་ཅན་ལ་ལམ་འབྲས་དང་ལམ་ཟབ་བརྒྱུད་པ་བརྐོས་པ་རྣམས་ལ། དཔལ་ཀྱེ་རྡོ་རྗེའི་དཀྱིལ་འཁོར་དང་འབྲེལ་བའི་རབ་གནས་སོགས་བསྟན་འགྲོའི་དོན་རྒྱ་ཆེར་མཛད། གང་གི་སྐུ་རྒྱུ་རིན་ཅེན་རྡོ། །སྦྱིན་པོ་དོལ་མཐའི་གཞི་བདག་ཀྱང༌། །