[A:༥༡༠]བའི་དཔལ་ལ་བཀོད། དེ་ནས་མི་རིང་པར་ཁ་ཆེ་འདུས་བཟང་མཁས་མཆོག་དབྱིག་གཉེན་གྱི་ཕྱོགས་སུ་བྱོན་པ་བཞིན་ངུར་སྨྲིག་གོས་ཀྱིས་ནམ་མཁའི་ཁ་དོག་འགྱུར་པ་ལྟ་བུའི་འདུས་ཚོགས་ཀྱི་སེར་སྦྲེང་འཕན་གདུགས་རྒྱལ་མཚན་རོལ་ཆ་སོགས་མཆོད་ཚོགས་བསམ་གྱིས་མི་ཁྱབ་པ་ཐོགས་པས་མདུན་བདར་ཆིབས་བསུའི་བཀོད་པ་སྔོན་དུ་འགྲོ་བས་རྒྱལ་བ་ཞེས་པ་ཤིང་ཕོ་རྟའི་ལོ་ཐུབ་བསྟན་དགེ་འཕེལ་གྱི་གདན་སེང་གེའི་ཁྲི་ལ་ཞབས་ཀྱི་ཆུ་སྐྱེས་རྣམ་པར་བཀོད། དེ་ནས་ཁམས་པ་སངས་རྒྱས་རྡོ་རྗེ། མི་ཉག་མགོན་པོ་འོད་ཟེར། ཆོས་རྗེ་བྲག་ཆོས་པ། ཕུ་པ་དབུ་མཛད་ཚུལ་ཁྲིམས་སོགས་རིན་པོ་ཆེ་ལྟ་བུའི་གདུལ་བྱ་དབང་པོ་ཡང་རབ་ཀྱི་སྐལ་ལྡན་རྣམས་ལ་གསུང་ངག་རིན་པོ་ཆེ་ལམ་འབྲས་བུ་དང་བཅས་པ་སློབ་མ་མཆོག་ལ་བཤད་བྱའི་དབང་བྱིན་རླབས་འཁྲིད་ལུང་ཤིན་ཏུ་སྨིན་པ་ལོ་འཁོར་གྱི་བར་དུ་འཛུགས་པ་ལམ་སྐོར་ཕྱི་མ་བརྒྱད་དང༌། རྩ་རྒྱུད་བརྟག་པ་གཉིས་པར་ཀུན་ཏུ་དགོས་པའི་གཞུང་བདུན་གྱིས་ཉེ་བར་སྤྲས་པའི་གསུང་བཤད། གཞན་ཡང་དབང་རྗེས་གནང་སོགས་སོ་སོའི་བློ་དང་འཚམ་པའི་ཆོས་ཀྱི་སྒོ་འཕར་ཕྱེ་ནས་རེ་བ་དོན་ལྡན་གྱི་ས་ལ་བཀོད། དེའི་ཚེ་འོད་གསལ་ལ་བདག་ཆེན་བློ་གྲོས་རྒྱལ་མཚན་པ་ཡིན་ཟེར་པའི་དགེ་བའི་བཤེས་གཉེན་ཁྱད་དུ་འཕགས་པ་ཞིག་དང་རིན་པོ་ཆེ་རྡོ་རིང་པ་དངོས་སུ་བྱོན་ནས་དགྱེས་པའི་འཛུམ་ཞལ་བསྟན་པ་ནི་རིན་ཆེན་སྒང་པ་སྒོས་ཀྱི་ཟབ་ཆོས་རྣམས་ཆེས་ཆེར་སྤེལ་བ་ལ་ལེགས་སོ་མཛད་པར་འདུག །མགོན་ཁང་དུ་རྫས་འཁོར་ལོ་གཟུངས་སྔགས་སོགས་ཆོས་སྐྱོང་གི་རྟེན་བཞེང་པའི་མན་ངག་ལྟར་ལེགས་པར་བསྐྲུན་