[A:༥༠༩] སྲུང་མ་འདི་ནི། བར་ཆད་ལམ་སེལ་མ་ལས། བྲག་ནག་ཧ་པོའི་མགོན་ཁང་དུཿ ཤོ་བཙན་དམར་པོ་དམ་ལ་བཏགས༔ ཞེས་པ་དེ་ཡིན་ཞིང་རྗེ་འདི་ཉིད་ཀྱི་བཀའ་ལས་ཅུང་ཟད་ཙམ་ཡང་མི་འདའ་ལ། གཞན་དུ་དྲག་ཤུལ་དང་གདུག་རྩུབ་ཆེ་བས་ཐུབ་བསྟན་དགེ་འཕེལ་གྱི་འོག་ཙམ་བྱང་རིའི་ལྡེབས་ལ་རྟེན་མཁར་ཡོད་པའི་མདུན་དེར་བླ་ཆེན་སྡེ་དཔོན་སྔགས་པ་རྟོགས་ལྡན་སོགས་ལུགས་གཉིས་གང་རུང་གིས་མངོན་པར་མཐོ་རློམ་རྣམས་ཀྱིས་རྟ་མ་བབས་ན་ཉིན་ཞག་གི་ཁོངས་སུ་རྟ་འཆི་བ་ཡོང་བའི་གྲགས་པས། ས་སྐྱ་ནས་བདག་ཆེན་རིན་པོ་ཆེ་ཕེབས་སྐབས་ཀྱང་དེ་གར་གཏོར་བསྔོ་མཛད་རྗེས་ཆིབས་ཡོབ་གཡས་འབུད། ཞབས་འབྲིང་བ་རྣམས་རྐང་འགྲོས་བྱེད། ཕྱག་རྫོགས་ཀྱི་རྟོགས་པ་ཀློང་དུ་རྡོལ་བའི་སྒོམ་སྨྱོན་སྤྲུལ་སྐུ་དང༌། སྟོབས་འབྱོར་གྱི་དྲེགས་ལྡན་སྡེ་པ་ནོར་བུ་སོགས་ཀྱི་རྟ་ན་ཤི་མང་དུ་བྱུང་བར་རྣམ་རྟོག་ལངས་གསོལ་མཆོད་ཕུལ་བས་མཚོན་ཆེས་མང་ལ། ཚར་ལུགས་ལ་དེ་རིང་ཞུགས་པའི་གསར་བུ་བ་ཞིག་ཀྱང་རྟ་འབབ་མི་དགོས་པ་སོགས་མངོན་སུམ་གྱི་སྤྱོད་ཡུལ་དུ་གྱུར་པས་སོ། །འོད་གསལ་གྱི་ལྟས་ལྟར་སང་ཉིན་ཐུབ་བསྟན་དགེ་འཕེལ་གྱི་ཆོས་གྲྭ་ཆེན་པོ་ནས། གདན་ས་མཛད་དགོས་པའི་སྙན་ཞུས་འབུལ་མཁན་བྱུང་བས་བསྟན་པ་དང་སེམས་ཅན་གྱི་དོན་རྒྱ་ཆེན་པོར་འགྱུར་བར་དགོངས་ཏེ་ཐུགས་དགྱེས་བ་ཆེན་པོས། བཀའ་ལས། དེ་ལྟར་ཁོ་བོ་ལ་རྩེ་གཅིག་ཏུ་གསོལ་བ་འདེབས་པ་ཡིན་ན་ཅིས་ཀྱང་དེ་བཞིན་དུ་བྱའོ་ཞེས་ཞལ་གྱི་འཆེས་པས་གསོལ་འདེབས་པ་རྣམས་ཡིད་བདེ་