[A:༥༠༦]ཡིན་པས་མདོ་སྔགས་ཀྱི་གྲ་དང་སྡེ། ས་སྐྱོང་བའི་ཆེ་དགུ། རིགས་རུས་ཀྱིས་མཐོ་བའི་ཡ་རབས། རྣམ་དཔྱོད་དང་ལྡན་པའི་མཁས་པ། ཉམས་རྟོགས་དང་ལྡན་པའི་སྒོམ་ཆེན། དཔའ་མཛངས་ལོངས་སྤྱོད་དང་ལྡན་པའི་དཔོན་སྐྱ་སོགས་སྐྱེ་བོ་ཐམས་ཅད་ཀྱི་བསམ་བློའི་ཡུལ་དུ་དམ་པ་འདི་ཉིད་བདག་ཅག་གི་སྐྱབས་གནས་སུ་ཐོབ་ན་ཅི་མ་རུང་སྙམ་པའི་འདུན་པ་རྩེ་གཅིག་ཏུ་གྱུར་པས། རྗེ་ཉིད་ཀྱིས་ཆོས་སྐྱོང་རྣམས་ལ་བཀའ་བསྒོ་བའི་ཚིགས་བཅད་ལས། འདི་ན་སྐྱེ་རྒུའི་ཕན་བདེ་མ་ལུས་པ། །རྒྱལ་བའི་བསྟན་པ་མཆོག་ལ་རག་ལས་ཤིང༌། །བྱང་ཕྱོགས་འདི་ན་བསྟན་པའི་སྙིང་པོ་མཆོག །ས་སྐྱའི་རྗེ་བཙུན་ཞབས་ལས་བརྒྱུད་འདི་ཡིན། །དེ་ཡི་ཡང་སྙིང་གསང་ཆེན་ཟབ་མོའི་བཅུད། །ཞལ་དང་སྙན་དུ་བརྒྱུད་པའི་མཛོད་འཛིན་པ། །ཁོ་བོའི་འདྲེན་མཆོག་རྗེ་བཙུན་རྡོ་རིང་ཞབས། །བཀའ་དྲིན་མཉམ་མེད་དམ་པའི་སྲོལ་འདིར་བས། །དེ་ཉིད་མཆོད་ཅིང་བཀུར་བའི་སྦྱིན་པའི་བདག །སྟོད་ལུང་ས་ཡི་ཐིག་ལེའི་སྟོབས་ལྡན་ནི། །སྤ་ར་བ་ཞེས་གྲགས་པའི་བ་དན་ཅན། །ཞེས་པ་ལྟར་སྟོད་ལུང་ནས་སྡེ་པ་སྤ་ར་བ་རྗེ་བཙུན་ས་སྐྱ་པའི་བསྟན་པ་ལ་མི་ཕྱེད་པའི་དད་པ་དང་ལྡན་པས་གསུང་ངག་རིན་པོ་ཆེའི་བླ་མ་བརྒྱུད་པའི་གསེར་སྐུ་གྲྭ་ཚར་བཞེངས་པའི་རབ་གནས་ལ་གདན་དྲངས་ཏེ་སྟོད་ནས་ཆིབས་ཁ་བསྐྱོད། དམ་ཚིག་པ་ལ་ཡེ་ཤེས་སེམས་དཔའ་དངོས་སུ་འཇུག་པར་མཚོན་འདོད་ཆོས་རྐྱེན་སེལ་གྱི་རིམ་གྲོ་སོགས་རེ་བ་ཡོངས་སུ་སྐོང་བར་མཛད་ཅིང༌། རྡོ་རྗེའི་ཆོས་སྐྱོང་རྣམས་ཀྱི་རྟག་གཏོར་འཛུགས་པ་སོགས་མགོན་ཁང་བཞེང་པ་གནང་ཚེ། ན་མོ་གུ་རུ་དེ་ཝ་