[A:༥༠༥]བླ་མ་འཁོར་ལོ་སྡོམ་པར་གཟིགས། །དགེ་འཕེལ་ཆོས་ཀྱི་ཁྲི་ལ་སྤྱན་འདྲེན་པའི། །གཞི་བདག་གུས་པའི་རྣམ་འཕྲུལ་ཕོ་ཉའི་ཚུལ། །ཞབས་ཀྱི་པདྨར་སོན་ལ་གསོལ་བ་འདེབས། །ངག་དབང་དབྱངས་ཅན་ལྷ་མོའི་བཟླས་བརྗོད་ཚེ། །མཁའ་ལ་མེ་ཏོག་དཀར་པོའི་ཆར་བབས་ཤིང༌། །རྒྱུད་མངས་སྒྲ་སྙན་རྣ་བའི་བདུད་རྩི་མཆོག །འོད་གསལ་ངང་དུ་གསན་ལ་གསོལ་བ་འདེབས། །མནལ་ལམ་ངང་དུ་དཔའ་བོ་མཁའ་འགྲོའི་ཚོགས། །སྒྲོན་མེ་བཏེག་ནས་རྗེ་བཙུན་རྡོ་རིང་པའི། །འཁོར་སློབ་འཚོལ་བའི་ཟོལ་གྱི་རྣམ་ཐར་མཆོག །རྩོམ་པར་བསྐུལ་བ་གཟིགས་ལ་གསོལ་བ་འདེབས། །གྲངས་མེད་མཁའ་འགྲོ་འདུ་བའི་ཚོགས་དབུས་ཀྱི། །གཙོ་མོ་པདྨའི་དྲ་བ་ཅན་ཞེས་པས། །གླེགས་བམ་བསྟན་ཅིང་ཆོ་འཕྲུལ་སྣ་ཚོགས་བཅས། །འདྲི་བའི་ཡོ་བྱད་གཏད་ལ་གསོལ་བ་འདེབས། །ཆོས་ཀྱི་ཁྲི་ལ་འཁོར་བའི་རབ་བྱུང་གིས། །རྒྱལ་བའི་རྟོགས་བརྗོད་ཀློག་པའི་ཚུལ་ཅན་ལ། །མཁའ་འགྲོའི་ཚོགས་རྣམས་དགའ་བས་ཉན་པ་སོགས། །དགེ་མཚན་དུ་མ་གཟིགས་ལ་གསོལ་བ་འདེབས། །རྗེ་བཙུན་བླ་མས་ཞལ་བཟང་ཡང་ཡང་བསྟན། །རྣམ་ཐར་རྩོམ་པའི་བྱ་བ་མཐར་ཕྱིན་ཚེ། །དཔལ་ལྡན་འདོད་ཁམས་དབང་མོས་དགྱེས་པ་ཡི། །སྲུང་མར་ཞལ་གྱིས་བཞེས་ལ་གསོལ་བ་འདེབས། །ཞེས་དངོས་ཤུགས་སྣ་ཚོགས་པ། དེ་ལྟར་མཁས་བཙུན་བཟང་པོའི་བདག་ཉིད་ཅན་རྣམས་ནི་འཁོར་བའི་མཐའ་མ་རྫོགས་པ་དེ་སྲིད་དུ་རྣམ་པར་དཀར་བའི་འཕྲིན་ལས་ཀྱི་རྒྱུན་ཆད་པ་མེད་པར་འཇུག་པ་ཆོས་ཉིད་