[A:༥༠༧]མཎྜ་ལ་དྷརྨ་པཱ་ལ་ས་པ་རི་ཝཱ་རེ་བྷྱཿ ཀུན་ཁྱབ་ཀུན་གྱི་བྱེད་པོ་གཅིག་ཉིད་སྲིད་ཞིའི་གཟུགས་ཀྱིས་ཀུན་ལ་འཁྱུད། །རྒྱལ་དང་རྒྱལ་སྲས་སློབ་མར་བཅས་པའི་ཚོགས་ཀྱི་གཙོ་བོ་རྒྱལ་བ་རྗེ། །མཐའ་ཡས་མཐའ་མེད་འགྲོ་བའི་སྐྱབས་མཆོག་རྗེ་བཙུན་བླ་མ་སྲིད་མཐའ་བར། །གཙུག་རྒྱན་གཙུག་གི་ནོར་བུར་གུས་མཆོད་འབྲལ་བ་མེད་པར་གཙུག་ཏུ་བཞུགས། །ཞེས་སོགས་མཁའ་འགྲོ་ལྔ་བསྟོད་བསྐུལ་དང༌། དམ་ཅན་སྲུང་མ་དགྱེས་པའི་རྣལ་འབྱོར་པ། །རྡོ་རྗེ་འཛིན་པ་བློ་གསལ་རྒྱ་མཚོའི་སྡེས། །གནས་ལུགས་བདེ་བ་ཆེན་པོའི་མཁའ་དབྱིངས་སུ། །རབ་ཟབ་ཐབས་ཀྱིས་བསྒྲུབས་པའི་མཆོད་པའི་སྤྲིན། །ཞེས་རྒྱུད་དང་མན་ངག་ལས་བྱུང་བའི་ཕྱི་ནང་གསང་མཆོད་རྒྱས་པར་དབུལ་མཐར། རྒྱལ་བའི་བསྟན་པ་སྤྱི་དང་བྱེ་བྲག་ཏུ། །དཔལ་ལྡན་ས་སྐྱ་པ་ཞེས་གྲགས་པ་ཡི། །བསྟན་པའི་ཉིང་ཁུ་རྗེ་བཙུན་རྡོ་རིང་པའི། །བསྟན་པ་ས་ཡི་ཕྱོགས་འདིར་དར་རྒྱས་མཛོད། །དེ་ཉིད་འཛིན་དང་མཆོད་པའི་སྦྱིན་པའི་བདག །མི་ནོར་འཁོར་བཅས་བསྲུང་དང་སྦ་བ་དང༌། །འདུ་འབྲལ་མེད་པར་རྟག་ཏུ་སྐྱོང་བར་མཛོད། །ཅེས་དང༌། ད་ལྟའི་གནོད་བྱེད་མི་དང་མི་མ་ཡིན། །སྐད་ཅིག་ཉིད་ལ་མངོན་སུམ་འདིར་ཁུག་ལ། །རབ་རྣོན་མཚོན་ཆས་མགོ་ལུས་དུམ་བུར་གཏུབས། །ཁྲག་ཞག་དོན་སྙིང་དམར་པོ་ཧབ་ཀྱིས་ཐོབ། །ཅེས་ཕྲིན་ལས་རྒྱས་པར་མཛད། རིང་ཞིག་ན་འགྲོ་བའི་ལས་སྨིན་བདོ་བ་རྒྱལ་པོ་གཟུགས་ཅན་སྙིང་པོ་ལྟར་ཚད་བཟུང་དཀའ་མོད། ཧོར་བྱ་རིག་སོགས་རྗེས་མ་རྣམས་ལའང་སྲུང་མའི་ཟ་ཁ་ཟུག་སྟེ་མིང་གི་ལྷག་མར་གྱུར།