[A:506]yin pas mdo sngags kyi gra dang sde/ sa skyong ba'i che dgu/ rigs rus kyis mtho ba'i ya rabs/ rnam dpyod dang ldan pa'i mkhas pa/ nyams rtogs dang ldan pa'i sgom chen/ dpa' mdzangs longs spyod dang ldan pa'i dpon skya sogs skye bo thams cad kyi bsam blo'i yul du dam pa 'di nyid bdag cag gi skyabs gnas su thob na ci ma rung snyam pa'i 'dun pa rtse gcig tu gyur pas/ rje nyid kyis chos skyong rnams la bka' bsgo ba'i tshigs bcad las/ 'di na skye rgu'i phan bde ma lus pa/ /rgyal ba'i bstan pa mchog la rag las shing / /byang phyogs 'di na bstan pa'i snying po mchog /sa skya'i rje btsun zhabs las brgyud 'di yin/ /de yi yang snying gsang chen zab mo'i bcud/ /zhal dang snyan du brgyud pa'i mdzod 'dzin pa/ /kho bo'i 'dren mchog rje btsun rdo ring zhabs/ /bka' drin mnyam med dam pa'i srol 'dir bas/ /de nyid mchod cing bkur ba'i sbyin pa'i bdag /stod lung sa yi thig le'i stobs ldan ni/ /spa ra ba zhes grags pa'i ba dan can/ /zhes pa ltar stod lung nas sde pa spa ra ba rje btsun sa skya pa'i bstan pa la mi phyed pa'i dad pa dang ldan pas gsung ngag rin po che'i bla ma brgyud pa'i gser sku grwa tshar bzhengs pa'i rab gnas la gdan drangs te stod nas chibs kha bskyod/ dam tshig pa la ye shes sems dpa' dngos su 'jug par mtshon 'dod chos rkyen sel gyi rim gro sogs re ba yongs su skong bar mdzad cing / rdo rje'i chos skyong rnams kyi rtag gtor 'dzugs pa sogs mgon khang bzheng pa gnang tshe/ na mo gu ru de wa