[A:༥༠༢] དེ་ནས་ཆོ་འཕྲུལ་ཆེན་པོའི་ཚེས་བཅོ་ལྔ་ནས་ཟླ་གཅིག་ཙམ་གྱི་བར་སྐུ་མཚམས་བཅད་དེ་དབང་དྲག་པདྨ་ཉེ་བར་བསྙེན་པའི་ཚེ་རྒྱལ་བ་ཀུན་འདུས་པདྨ་ཐོད་འཕྲེང་རྩལ་གྱིས་ཞལ་བསྟན་ཞིང་གསུང་གི་གནང་བ་དང་བཅས་དབུགས་དབྱུང༌། འཕགས་ཡུལ་གྱི་སློབ་དཔོན་པདྨཱ་ཀ་ར་དང་བོད་ཀྱི་ལོ་ཆེན་བཻ་རོའི་ཐུགས་ཀྱི་ཉིང་ཁུ་ཡང་གསང་ཁྲོས་པ་ལྷ་དགུའི་གསུང་བསྙེན་དང་དེའི་ཡིག་ཆ་ལ་བརྟེན་ནས་མྱོང་གྲོལ་བདུད་རྩིའི་རིལ་བུའི་སྒྲུབ་པ་གནང་བའི་ཚེ་དཀྱིལ་འཁོར་གྱི་ལྷ་ཚོགས་དང་གནོད་སྦྱིན་ལྕམ་དྲལ་རྒྱུད་ནས་བཤད་པའི་སྲུང་མ་རྣམས་ཀྱིས་རང་རང་གི་སྐུ་དངོས་སུ་བསྟན་པའི་ཚེ་གིང་ལྔའི་རྟ་རྨིག་ཀྱང་ནམ་མཁར་མི་ཤོང་བ་ལྟ་བུ་གཟིགས། རྨུར་སྐོར་ཙམ་ཕེབས་པའི་ཚེ་ཡང་གཟིགས་སྣང་དེ་འདྲ་བ་བྱུང་བའི་རྐྱེན་གྱིས་ཆིབས་དྲག་ཏུ་བསྐུལ་ནས་ཕེབས་པས་བུ་རི་འཕྲང་གི་མས་སྣར་ཆིབས་པའི་རྨིག་རྗེས་ཤིན་ཏུ་གསལ་བ་ད་ལྟའང་ཀུན་གྱི་སྤྱོད་ཡུལ་དུ་མཆིས། དེ་ཡང་ཆོ་འཕྲུལ་བསྟན་པའི་མདོ་ལས། རྒྱལ་སྲིད་མཆིལ་མའི་ཐལ་བ་བཞིན་སྤངས་ནས། །དབེན་པར་དོང་སྟེ་དགོན་པར་གནས་བྱེད་པ། །ཉོན་མོངས་སྤངས་ནས་བདུད་ནི་བཅོམས་ནས་སུ། །བྱང་ཆུབ་རྡུལ་མེད་འདུས་མ་བྱས་འཚང་རྒྱ། །ཞེས་སྲིད་པ་འཁོར་བ་ལ་ཡིད་འབྱུང་བའི་རང་བྱུང་གི་བསླབ་པ་ལ་བརྟེན་ནས་མྱུར་དུ་བྱང་ཆུབ་རྙེད་པར་འགྱུར་པའི་གཙོ་བོ་ནི། དགེ་སློང་ལ་རབ་ཏུ་གཅེས་པའི་མདོ་ལས། དགེ་སློང་ཞེས་བྱ་སྡུག་བསྔལ་སྤོང་བ་ཡིན། །དགེ་སློང་ཞེས་བྱ་རྒྱལ་བའི་སྲས་པོའོ། །ཞེས་འཁོར་ལོས་སྒྱུར་བའི་རྒྱལ་པོ་ལ་སྲས་སྟོང་ཡོད་ཀྱང་ཐུ་བོ་ལ་རྒྱལ་སྲིད་འབྱུང་བ་བཞིན་འཁོར་རྣམ་པ་བཞིའི་ནང་ནས་མཆོག་ཏུ་གྱུར་པ་