[A:༥༠༡]པ་མཐོང༌། སླར་གཟིམས་སྤྱིལ་དུ་ཕེབས། བྲག་གི་ཕུག་ནས་ལྕགས་ཀྱི་རྡོ་རྗེ་རྩེ་དགུ་པ་ཞིག་བྱུང་བ་ཐུབ་བསྟན་དགེ་འཕེལ་གྱི་མགོན་པོའི་ཐུགས་ཀར་བཞུགས། བཀའ་ལས། འཕུར་བ་ཡིན་ཟེར་ཆེད་དུ་ཐེབ་ཐེབ་རང་དགོས་དོགས་མེད་སེམས་ཅེར་བལྟས་པས་གང་དགོས་ས་རུ་སླེབས་ཡོང་བ་ཡིན་གསུངས། དེ་དུས་བདེ་སྟོང་ལྷན་ཅིག་སྐྱེས་པའི་ཡེ་ཤེས་མངོན་དུ་གྱུར་པའི་ཉམས་འུར་ཆེན་པོས་འཁྲུལ་སྣང་ཨ་འཐས་རྫུན་ཕུགས་རྡིབ་པའི་ཀུན་ཏུ་བཟང་པོའི་སྤྱོད་པ་གྲུབ་པའི་ས་དང་ལམ་གྱི་རྟོགས་པ་མཐར་ཕྱིན་པ་མཛད་པ་ཡིན་ཏེ། ཡང་གསང་བརྒྱུད་འདེབས་ལས། མང་མཁར་ཆ་ལུང་རྡོ་རྗེའི་བྲག་རྫོང་དུ། །བློ་གསལ་བུང་བ་འདུ་བའི་པདྨོའི་ཚལ། །རྒྱུད་སྡེ་རྒྱ་མཚོའི་བཅུད་ཕྱུང་གདམས་པའི་གཏེར། །དྲིན་ཅན་ཚར་པ་སྨྱོན་པར་གསོལ་བ་འདེབས། །ཞེས་བྱུང་ལ། གནས་འདི་དང་ཐུབ་བསྟན་དགེ་འཕེལ་གཉིས་སུ་ཆོས་ཉིད་སྐྱེ་བ་མེད་པའི་དོན་མངོན་དུ་མཛད་པའི་ཚུལ་བསྟན་པ་ཡིན་ཏེ། ཇི་སྐད་དུ། གཞི་འཁྲུལ་སྣང་གི་རང་ཞལ་བལྟས་ཙ་ན། །བརྗོད་མེད་ཀྱི་དབྱིངས་སུ་རྗེན་ནེ་བ། །གསེར་གླིང་དུ་བོལ་དུམ་ངས་མ་རྙེད། །མ་སེམས་ཅན་ཚོ་མགོ་བོ་གང་ནས་འཁོར། །ཞེས་དང༌། ལམ་བསྐྱེད་རྫོགས་གནད་དུ་བསྣུན་ཙ་ན། །སྤྱིར་སྣང་འདི་ཉམས་ཀྱི་བན་མ་བུན། །སྣང་གྲག་རིག་གསུམ་འདི་རྒྱལ་བའི་ངང༌། །ཁོང་རྣལ་འབྱོར་ཚོ་བླང་དོར་ག་ལ་བྱེད། །ལམ་སྒོམ་པའི་འབྲས་བུ་སྒྲ་བོ་ཆེ། །གཞི་མངོན་དུ་གྱུར་པའི་སྐད་དུ་གདའ། །འདི་རང་བཅས་སུ་ཡོད་པ་རང་ངོ་ཤེས། །ད་འབྲས་བུ་བྱ་བ་གཞན་མ་མཆིས། །ཞེས་གསུངས།