[A:༥༠༠]ཉིད་བཟང་པོ་བཟང་པོ་ཞེས་པའི་མིང་ཙམ་གྱི་སྟོང་འུར་མཁན་རྣམས་དང་མི་འདྲ་བར་སླུ་མེད་གཏན་གྱི་སྐྱབས་མཆོག་ཏུ་ལུང་དང་རིགས་པས་བསྒྲུབ་ནུས་པས་དྲན་པའི་མོད་ལ་སྲིད་ཞིའི་གདུང་བ་མཐའ་དག་སེལ་བར་སྣང༌། བཅོམ་ལྡན་འདས་དགྱེས་མཛད་རྡོ་རྗེ་དང་མ་ཧེའི་ཞལ་ཅན་སོགས་ཡི་དམ་གྱི་ལྷ་མང་པོ་ནང་རང་བྱུང་ལུས་ཀྱི་ཕོ་བྲང་དུ་རླུང་སེམས་དག་པའི་གར་མཁན་མེ་ལོང་ལས་གཟུགས་བརྙན་ལྟར་ཕྱི་རོལ་ཏུ་ཤར་ཏེ་ཞལ་གཟིགས། གུར་ཞལ། བེག་ཙེ། སྟག་ཞོན་སོགས་དམ་ཅན་སྲུང་མ་རྣམས་རྒྱལ་གྱིས་འབངས་ལ་བསྒོ་བ་བཞིན་ཇི་ལྟར་བཞེད་པའི་འཕྲིན་ལས་བསྒྲུབ་པ་ལ་མི་གཡེལ་ལོ། །རིང་པོར་མ་ལོན་པར་མང་མཁར་དུ་བྱོན་ཏེ་ས་སྐྱའི་མི་འགྱུར་བའི་གཟེར་བཞི་ཞེས་པ་ཤར་དུ་བྱ་འགྱུར་རྡོ་རྗེའི་བྲག །ལྷོར་ཕུལ་བྱུང་བདུད་པོ་བྲག །ནུབ་ཏུ་ཆ་ལུང་རྡོ་རྗེ་བྲག །བྱང་དུ་ག་ར་གཡའ་ཡི་བྲག་སྟེ་བཞིའི་ནང་ནས་ཆ་ལུང་རྡོ་རྗེ་བྲག་རྫོང་གི་རྗེ་བཙུན་གྲགས་པ་རྒྱལ་མཚན་གྱི་གཟིམས་སྤྱིལ་ཤིང་སྒོ་མ་ཟེར་བའི་ཕུག་པར་སྒྲུབ་པ་མཛད་ཀྱིན་བཞུགས་པའི་རེ་ཞིག་ན་ཉེ་བའི་སྲི་ཞུ་བ་དེས་སྔ་དྲོ་དྲུང་དུ་ཕྱིན་པས་གཟིམས་ཞྭ་སྦུབས་ཐིབས་སེ་བྱས་སྐུ་དངོས་ནི་མི་སྣང༌། ཅི་ཡིན་སྒོ་བཅའ་སོགས་ནི་མདང་ནུབ་ཀྱི་དེ་ག་འདུག་སྐར་ཁུང་ནི་ཤིན་ཏུ་ཆུང་གང་ཡིན་སྙམ་ནས་སླར་ལོག་སྟེ་སྒོའི་ཕྱི་ནས་བལྟས་པས་ལྷོའི་མཆོད་རྟེན་གྱི་དྲུང་ན་ཆོས་གོས་རྣམ་གསུམ་དང་བཅས་སྐུ་ཟིལ་པ་ཕྲོམ་མེ་འོད་མེར་རེ་བཞུགས་འདུག་པ་ན་བདག་ཅག་གི་བླ་མ་དམ་པ་ནི་གང་ལའང་ཐོགས་པ་མེད་པར་འཕུར་ཏེ་བྱོན་ཏོ་སྙམ་དད་པ་ཟི་བུན་པའི་ངང་ནས་སྐུ་དྲུང་དུ་ཕྱིན་པ་ལྟ་སྟངས་ཀྱི་ངང་ན་ཧད་དེ་བཞུགས་