[A:༤༩༩]གསོལ་བ་འདེབས་སོ་རྡོར་རིང་པ། །བུ་མི་མངོན་དབྱིངས་ནས་ཐུགས་རྗེས་སྐྱོངས། །ཚོགས་མཆོད་པར་འབུལ་ལོ་དྲིན་ཅན་རྗེ ། །ལུས་སྣང་སྟོང་སྤྲུལ་སྐུར་བྱིན་གྱིས་རློབས། །ཞེས་སོགས་ཚིག་དོན་ངོ་མཚར་བ་ཡོད། ཆུ་བོ་རིའི་དུར་ཁྲོད་དུ་ཚོགས་འཁོར་མཛད་ནས་བཞུགས་པའི་མཐོ་ཕྱིར་ཤབ་ཤུབ་ཀྱི་སྒྲ་དང་བཅས་སྐོར་བ་བྱེད་པའི་སྐད་ཐམས་ཅད་ཀྱིས་ཐོས་པར་བྱུང༌། དུར་ཁྲོད་དེའི་གོང་ཙམ་དུ་ཐུགས་དམ་ལ་ཅུང་ཟད་བཞུགས་པའི་གནས་དེར་ཞབས་འབྲིང་བ་རྣམས་ཀྱིས་མངོན་སུམ་དུ་རླུང་འཚུབ་ཆེན་པོའི་དཀྱིལ་ནས་ཐག་སྒྲ་ཆེན་པོ་ཡང་ཡང་བྱུང་སྐབས། དཔལ་ལྡན་ལྷ་མོ་དུད་པའི་སོལ་བ་ཅན་སྐུ་སྟོད་ཇ་བསུས་པའི་རླངས་པ་ལྟ་བུ་སྔོ་སྐྱ་ནམ་མཁའ་ཁེངས་པ་གསལ་བར་གཟིགས་ཤིང་ཤོག་དྲིལ་ཞིག་ཕྱག་ཏུ་ཕུལ། དེ་ནས་བཟུང་དུས་རྒྱུན་དུ་བདེ་ཆེན་གྱི་ཉམས་བཟུང་དུ་མེད་པ་རྡོལ། དེ་ལ་བརྟེན་དུས་ལན་ཅིག་མ་ཡིན་པར་བདེ་སྟོང་ལྷན་ཅིག་སྐྱེས་པའི་ཡེ་ཤེས་ཁོར་ཡུག་ཏུ་གཡོ་བ་མེད་པའི་རྒྱུ་མཚན། ཐུགས་དམ་གྱི་རིམ་པ་སྟོད་ཕྱོགས་སུ་འཕེལ་བར་དགོངས་ཏེ་རྨུ་བླ་བྲང་དུ་བཞུགས་པའི་སྐབས་ཤིག་ཞབས་ཅུང་ཟད་བསྙུན་པའི་ཚུལ་བསྟན་ཚེ་འཁྲུལ་ཞིག་དཀོན་ཅོག་བཟང་པོར་ཞུ་ཤོག་ཕུལ་བའི་ནང་དུ་བདག་ཀྱང་ལུས་བསམ་གཏན་གྱི་ཁང་བུའི་སྒོར་མི་ཐོན་ཀྱང་སེམས་ལ་བདེ་ཆེན་གྱི་ཡེ་ཤེས་མནན་པས་མི་ནོན་པ་ཁོར་ཡུག་ཏུ་ཡོད་ཅེས་པའང་བྱུང༌། དེ་ཡང་རྗེ་བཙུན་ཆེན་པོས། ལྟ་བ་སྤྲོས་བྲལ་དུ་བློ་ཆམ་འགྲོ་ན་འདའ་ཁ་མ་མི་ཐེབས་པ་མི་སྲིད་ཚེ་འདི་དང་མཐོང་ལམ་གྱི་བར་ན་དར་ཙམ་ལས་མེད། ཅེས་པའི་ཚད་དེར་ཕེབས་ངེས་པས་དམ་པ་འདི་