[A:8a - 9a]/ /gzhon nu 'bum la sras gsum 'khrungs pa'i gcen rta dben kun dga' nyi ma gzhon nu nas yab chos rnams thugs su chud/ rin chen sgang gi 'phags pa'i chos khri nas chos gsungs/ gong nas gdan drangs ste byon gu shri'i mtshan gsol/ shel dam che ba thogs shugs dang bcas pa gnang/ bstan pa'i bya ba rgya cher mdzad nas/ chu pho khyi la pho brang chen por gshegs/ de'i gcung 'jam dbyangs don yod rgyal mtshan dpal bzang po ni/ lcags pho khyi la 'khrungs/ ta shri kun dga' rgyal mtshan dang gung rta gcig/ skye ba bdun pa'i mtshan nyid mnga'/ gzhon nu nas yon tan la sbyangs pas mkhas pa chen por gyur/ bka' rab 'jam dbyangs la dbang bsgyur/ mkhan chen bsod nams shakya pa/ bla ma dpal ldan seng ge/ dpang lo tsA ba/ brag kha pa grags pa seng ge/ chos rje brag phug pa/ rgyal sras thogs med pa/ bla ma bzang po sogs la mnga' ba'i sems skyed/ dbang khrid/ lung man ngag dang bcas pa gsan nas thos bsams mthar phyin/ 'chad rtsod rtsom gsum gyi dus mnga'/ bla ma mkhas btsun nam mkha' legs pas zhal lta gnang nas 'tshogs chos chen po rnam 'grel rig gter mngon pa gong 'og mdo sde rgyan/ spyod 'jug/ thub pa dgongs gsal te/ chos thun bdun bdun gsungs/ dung thebs bdun bdun byung/ gzhan yang gang la gang 'os pa'i chos gsungs nas sangs rgyas kyi bstan pa ches cher gsal ba mdzad/ phyag rdzas kyi dngos po rnams kyang dge 'dun gyi sde 'dzugs pa/ sems can dbul phongs la sbyin gtong rgya chen/ bstan bcos bod du 'gyur ro cog bzhengs pa sogs mdzad/ rgyal po chen pos ta dben gu shri'i mtshan shel dam thog shugs dang bcas pa gnang/ bstan pa'i mnga' bdag tu gyur/ bla ma 'di gdul bya dag pa 'gas 'jam dbyangs seng ge la chibs par mthong/ so lnga pa shing pho spre'u yi lo zla ba lnga pa'i tshes bcu gnyis la rin chen sgang bla brang gong mar zhi bar gshegs/ bla ma de'i gcung chos rje dpal ldan bla ma dam pa bsod nams rgyal mtshan dpal bzang po ni/ yab gung lo nga gcig pa chu pho byi ba'i lo la zha lu khang gsar du 'khrungs/ gu shri nam mkha' rgyal mtshan dang gung rta gcig/ lhums su 'jugs pa'i dus/ yum gyi rmi lam du nyi ma'i dkyil 'khor lto bar zhugs pa dang/ g.yas su gtsang po thungs pa'i rmis/ lo de'i sa ga zla ba'i tshes lnga la snga dro'i cha la bltams/ yum gyi rmi lam dang btun nas nyi ma bde ba'i blo gros zhes mtshan gsol/ kyog ma'i tshigs la thogs pa sra bstan pas thogs med du mkhyen/ gung lo brgyad pa la rtag gnyis bshad lugs du ma dang bcas pa