[A:༧༩]སོགས་ཁུངས་བཙུན་ལ། སྨད་འདུལ་བ་རྣམས་ནི། གཟུས་དང་བླ་མ་རྣམ་གསུམ་དང་རྒྱ་འདུལ་ལ་སོགས་པས་བཤད་པ་མང་དག་མཛད་ཀྱང་། རང་བཟོ་མ་གཏོགས་བརྒྱུད་པ་མེད་པས་ཁུངས་ཐུབ་མེད་དོ་ཞེས་ཟུར་ཟ་བར་མཛད་དེ། ཞང་ཞུང་པ་རྒྱལ་ཤེའི་སློབ་མ་ཞིང་མོ་ཆེ་པ་བྱང་ཆུབ་སེང་གེས་མཛད་པའི་བརྒྱུད་རིམ་གྱི་ཡི་གེ་ལས།
བསླབ་པ་གསུམ་ལས་ཚུལ་ཁྲིམས་ཀྱི༎
བསླབ་པ་སྟོན་པ་འདུལ་བ་ཡིན༎
སྡེ་སྣོད་བརྒྱུད་པ་གཉིས་ཡིན་ཏེ༎
ཕྱོགས་སྔ་མ་དང་ཕྱི་མའོ༎
དང་པོ་བོད་ཀྱི་བརྒྱུད་པ་སྟེ༎
དགེ་སློང་རྡོ་རྗེ་རྒྱལ་མཚན་གྱིས༎
སློབ་དཔོན་མེད་ཕྱིར་གཞུང་རྣམས་ལ༎
ལྟ་རྟོག་བྱས་ནས་བཤད་པ་མཛད༎
དེ་ལ་སློབ་པ་རྣམ་པ་བཞི༎
དགེ་སློང་ཚུལ་ཁྲིམས་འབྱུང་གནས་དང་༎
ཚུལ་ཁྲིམས་བྱང་ཆུབ་དབུས་ཀྱིའོ༎
དགེ་སློང་གྲགས་པ་རྒྱལ་མཚན་དང་༎
ཤེས་རབ་འོད་ནི་གཙང་གིའོ༎
དགེ་སློག་ཚུལ་ཁྲིམས་བླ་མ་སྟེ༎
ཚུལ་ཁྲིམས་འབྱུང་གནས་སློབ་མ་ནི༎
དགེ་སློང་རིན་ཆེན་བླ་མའོ༎
དེ་གཉིས་སློབ་མ་ཆེ་བའི་མཆོག༎
དགེ་བཤེས་དབང་ཕྱུག་ཚུལ་ཁྲིམས་ཡིན༎
དེ་ཡིས་བློ་ཡིས་བརྟག་བྱས་ནས༎
དགག་དགོས་རྒྱུ་མཚན་མང་པོ་བྱས༎
ཚུལ་ཁྲིམས་བླ་མས་ཡན་ལག་དང་༎
སྤྱི་དོན་བསྡུས་དོན་བམ་པོ་གསུམ༎
བློ་ཡིས་བརྟགས་ནས་ཡི་གེར་བཀོད༎
དེ་དག་སློབ་མ་ཆེ་བ་ནི༎
ཡེ་ཤེས་རྒྱན་གྱིས་མགོ་བསྒྲེ་བྱས༎
སློབ་དཔོན་སུན་དབྱུང་བློ་ཡིས་རྟོག༎
རྒྱ་གར་བརྒྱུད་པ་མེད་པ་ཡིན༎
དེ་ནི་ཕྱོགས་སྔ་འགོད་པའོ༎
ཞེས་སྨད་འདུལ་ལ་ཕྱོགས་སྔ་བརྗོད་ནས་དགག་པ་མང་དག་མཛད་རྗེས་རང་ལུགས་འཇོག་པ་ན།
ཕྱི་མ་མངའ་རིས་འདུལ་འཛིན་ལ༎
རྒྱ་གར་བརྒྱུད་པ་ཡོད་པར་བཞེད༎
དེ་ཡང་སྒྲུབ་པའི་བརྒྱུད་དང་ནི༎
བཤད་པའི་བརྒྱུད་