[A:༢༠༨]བམ་གཅིག་ཡོད་པའི་རྩོམ་ཆེན་པོ་མཛད་དེ། རྒྱལ་བའི་བསྟན་པ་གསལ་བར་མཛད་དོ༎
གསུམ་པ་འཆད་པས་བློ་གསལ་གྱི་བུ་སློབ་སྤེལ་བའི་ཚུལ་ནི། བཟོ་རིག་ནས་བཟུང་ཡོངས་སུ་རྫོགས་པའི་བར༎ དེ་དང་དེ་ཡི་བཀའ་བབས་ཉི་ཤུ་གསུམ༎ འཇམ་པའི་རྡོ་རྗེ་མི་ཡི་ཟློས་གར་མཁན༎ རྣམ་དག་འཁོན་གྱི་གདུང་རྒྱུད་རྣམ་པ་གསུམ༎ རིག་སྔགས་འཆང་བའི་ཁྱུ་མཆོག་ཆེན་པོ་གཅིག༎ ཉི་མ་ཟླ་བ་ལྟར་གྲགས་མཁས་གྲུབ་གཉིས༎ འཇིག་རྟེན་གསུམ་གྱི་མིག་གཅིག་ལོ་ཆེན་གསུམ༎ ཕྱོགས་ལས་རྣམ་པར་རྒྱལ་བའི་བཤེས་གཉེན་དྲུག༎ མདོ་སྔགས་ཡོངས་རྫོགས་མཁས་པ་བཅུ་གསུམ་དང་༎ པན་ཆེན་ཤཱཀྱ་ཤྲཱིའི་གདན་ས་གཉིས༎ འདུས་པ་རྒྱ་མཚོའི་གཙུག་རྒྱན་བཅུ་དྲུག་དང་༎ མཚན་ཉིད་རབ་འབྱམས་སྨྲ་བའི་བཤེས་གཉེན་གསུམ༎ སྔགས་གཞུང་རབ་འབྱམས་སྨྲ་བའི་བཤེས་གཉེན་གསུམ༎ གྲུབ་པའི་རྒྱལ་མཚན་འཛིན་པའི་རྣལ་འབྱོར་བཞི༎ དྲག་པོའི་བརྟུལ་ཞུགས་རྫོགས་པའི་སྔགས་འཆང་གཉིས༎ དཀའ་བཅུ་ལེགས་པར་སྨྲ་བ་སྟོང་ཕྲག་གཅིག༎ དཀའ་བཞི་ཀུན་ཏུ་སྨྲ་བ་སྟོང་ཕྲག་ཟུང་༎ ཕར་ཚད་ཤེས་པའི་སློབ་མ་ཁྲི་ཕྲག་བརྒལ༎ ཚེ་འདི་བློས་བཏང་གྲུབ་ཆེན་ལྔ་བཅུར་ལྡན༎ ལྷག་པར་རྒྱལ་བ་ཐམས་ཅད་བསྐྱེད་པའི་ཡུམ༎ རྡོ་རྗེ་ཕག་མོ་གསང་བའི་མཛོད་འཛིན་མ༎ ས་ལ་དགེ་སློང་མ་ཡིས་རབ་གྲགས་པ༎ སྤྲུལ་པའི་གར་གྱིས་གསང་བ་འཛིན་པར་མཛད༎
ཅེས་པ་ལྟར། བཀའ་བབས་ཉི་ཤུ་རྩ་གསུམ་ནི། བཟོ་རིག་གི་བཀའ་བབས་མངའ་རིས་པ་བསྟན་འཛིན་རྒྱལ་མཚན། གསོ་རིག་གི་བཀའ་བབས་བྱང་པ་རྣམ་རྒྱལ་གྲགས་བཟང་། སྙན་ངག་གི་བཀའ་བབས་ངམ་རིངས་