[A:༤༤༥]ཆོས་ཅིག་འཆད་པ་ཡིན་པས་ཁྱེད་རང་རྣམས་རེ་ཞིག་གཞན་དུ་གཤེགས་གསུངས་ནས། ཁོང་རྣམས་གཤེགས་སོང༌། ཆོས་རྗེ་འདི་ཉིད་ལ་གཤེགས་ཀྱང་མི་གསུང༌། རྗེས་ཀྱང་དེ་ཉིད་དུ་ཀ་བཞུགས་པས་དེ་ཉིན་ཆོས་རྗེ་ཡེ་ཤེས་རྒྱལ་མཚན་པ་ལ་གནང་བའི་ལམ་འབྲས་ཀྱི་ཆ་ལག་རྣམས་གསན་པས། བླ་མ་ལ་མོས་གུས་ཐུན་མོང་མ་ཡིན་པ་དང༌། ཐུགས་ལ་དགེས་ཚོར་བསམ་གྱིས་མི་ཁྱབ་པ་སྐྱེས་སོ་གསུངས་སོ། །གཞན་ཡང་བདེ་མཆོག་ལོ་ནག་དྲིལ་གསུམ་གྱི་ཕྱག་ལེན་དང༌། བཤད་པ་རྣམས་གསན་ནས་ཐུགས་སྦྱོང་ལེགས་པོ་མཛད་པས། ཕྱག་ལེན་དང་གོ་རྒྱུ་རྣམས་ལ་ཐུགས་སྐྱེད་ལེགས་པོ་བྱུང་བས། བླ་མ་དམ་པ་དཔལ་ལྡན་པ་ཐུགས་དགེས་ཏེ། སློབ་དཔོན་ཉིད་དགེ་བཤེས་དགའ་མོ་ཅིག་བྱུང་འདུག་ནན་ཏར་བཟང༌། འུ་ཅག་བྲག་ཕུག་པའི་དགེ་བཤེས་ཅིག་བྱེད་པ་ཡིན་ནོ་ཞེས་གསུངས་སོ། །དེ་ལྟར་དགུང་ལོ་དགུ་པ་ནས། དགུང་ལོ་ཉི་ཤུ་རྩ་ལྔ་པའི་བར་དུ་གཙོ་ཆེར་ཆོས་རྗེ་ཡེ་ཤེས་རྒྱལ་མཚན་པ་དང༌། གཞན་ཡང་ཆོས་རྗེ་དཔལ་ལྡན་པ་ལ་སོགས་པའི་དྲུང་དུ་བཀའ་ལུང་མན་ངག་མཐའ་ཡས་པའི་བཀའ་དྲིན་ནོས་ཏེ། དེ་རྣམས་ཀྱི་ཕྱག་ལེན་བཤད་པ། མན་ངག་ཕྲ་མོ་ཚུན་ཆོད་ལ་སྒྲོ་འདོགས་ལེགས་པར་བཅད་དེ་ཤིན་ཏུ་མཁས་པར་མཛད་དོ། །དགུང་ལོ་ཉི་ཤུ་རྩ་ལྔ་བཞེས་པའི་ཚེ་ཆོས་རྗེ་ཡེ་ཤེས་རྒྱལ་མཚན་པ་བདེ་བར་གཤེགས་ནས། ཐུགས་དགོངས་རྫོགས་པའི་ཐབས་རྣམས་ལེགས་པར་གྲུབ་པར་མཛད་དེ། སྔར་གསུང་ངག་རིན་པོ་ཆེ་མ་གསན་པས་གསུང་ངག་གསན་པར་དགོངས་པ་ལ། ཆོས་རྗེ་ལོ་ཙཱ་བ་སྐྱབས་མཆོག་པ་དེ། ཆོས་རྗེ་དཔལ་ལྡན་བླ་མ་དམ་པའི་ཐུགས་ཀྱི་སྲས་དགེ་བའི་བཤེས་གཉེན་མཐའ་ཡས་པ་ཡིན་ནོ་ཞེས་གྲགས་པ་ཆེ་བས། དེའི་དྲུང་དུ་གསུང་ངག་གསན་པར་བཞེད་དེ། ཤངས་ཆོས་འཁོར་སྒང་དུ་བྱོན་པས། གསུང་ངག་རྫོགས་པ་ནི་མ་བྱུང༌། འོན་ཀྱང་བླ་མ་ལྔ་བཅུ་པ། ཆོས་རྗེ་བླ་མ་དམ་པས་མཛད་པའི་བརྟག་གཉིས་ཊཱིཀ་ཆེན། གསང་འདུས་སྤྱི་དོན། རྩ་ལྟུང་བཅུ་བཞི་པ་རྣམས་ཀྱི་བཤད་པ། སྣང་བ་གསུམ་གྱི་ཁྲིད། བླ་མའི་རྣལ་འབྱོར།