[A:445]chos cig 'chad pa yin pas khyed rang rnams re zhig gzhan du gshegs gsungs nas/ khong rnams gshegs song / chos rje 'di nyid la gshegs kyang mi gsung / rjes kyang de nyid du ka bzhugs pas de nyin chos rje ye shes rgyal mtshan pa la gnang ba'i lam 'bras kyi cha lag rnams gsan pas/ bla ma la mos gus thun mong ma yin pa dang / thugs la dges tshor bsam gyis mi khyab pa skyes so gsungs so/ /gzhan yang bde mchog lo nag dril gsum gyi phyag len dang / bshad pa rnams gsan nas thugs sbyong legs po mdzad pas/ phyag len dang go rgyu rnams la thugs skyed legs po byung bas/ bla ma dam pa dpal ldan pa thugs dges te/ slob dpon nyid dge bshes dga' mo cig byung 'dug nan tar bzang / 'u cag brag phug pa'i dge bshes cig byed pa yin no zhes gsungs so/ /de ltar dgung lo dgu pa nas/ dgung lo nyi shu rtsa lnga pa'i bar du gtso cher chos rje ye shes rgyal mtshan pa dang / gzhan yang chos rje dpal ldan pa la sogs pa'i drung du bka' lung man ngag mtha' yas pa'i bka' drin nos te/ de rnams kyi phyag len bshad pa/ man ngag phra mo tshun chod la sgro 'dogs legs par bcad de shin tu mkhas par mdzad do/ /dgung lo nyi shu rtsa lnga bzhes pa'i tshe chos rje ye shes rgyal mtshan pa bde bar gshegs nas/ thugs dgongs rdzogs pa'i thabs rnams legs par grub par mdzad de/ sngar gsung ngag rin po che ma gsan pas gsung ngag gsan par dgongs pa la/ chos rje lo tsA ba skyabs mchog pa de/ chos rje dpal ldan bla ma dam pa'i thugs kyi sras dge ba'i bshes gnyen mtha' yas pa yin no zhes grags pa che bas/ de'i drung du gsung ngag gsan par bzhed de/ shangs chos 'khor sgang du byon pas/ gsung ngag rdzogs pa ni ma byung / 'on kyang bla ma lnga bcu pa/ chos rje bla ma dam pas mdzad pa'i brtag gnyis TIka chen/ gsang 'dus spyi don/ rtsa ltung bcu bzhi pa rnams kyi bshad pa/ snang ba gsum gyi khrid/ bla ma'i rnal 'byor/