[A:༤༡༩]གནང་བ་ནི། བླ་མ་དམ་པ་འདི་ཉིད་དང༌། བླ་མ་དམ་པ་མཁས་པའི་དབང་ཕྱུག་ཡེ་ཤེས་རྒྱལ་མཚན་དཔལ་བཟང་པོ་དང༌། མི་ཉག་གི་སྟོན་པ་རིན་ཆེན་རྡོ་རྗེ་དང་གསུམ་ཁོ་ན་ཡིན་གསུངས། མདོར་ན་གནས་དེ་ཉིད་དུ་གསུང་ངག་གི་ཆོས་སྐོར་རྫོགས་པར་མཛད་ནས། སྒྲུབ་ལུང་སྦྱིན་པའི་ཚེ། ཁྱོད་ལ་ཚེ་རིང་པོ་དང་རྟོགས་པ་བཟང་པོ་འོང་བས་ཉམས་ལེན་ལ་འབད་པ་ཐོན། ཕྱི་དུས་སློབ་མ་འགའ་ཞིག་ལའང་ཕན་པ་འབྱུང་གསུངས། ཡང་གསང་བ་འདུས་པ་མི་བསྐྱོད་རྡོ་རྗེ་ས་ལུགས་ཀྱི་དཀྱིལ་འཁོར་དུ་དབང་བསྐུར་བ་ཞུས་ནས་བསྐྱེད་རིམ་མདོར་བྱས་ཀྱི་ལུང་བཤད་ཙམ་ཅིག་དང༌། རྫོགས་རིམ་རིམ་པ་ལྔའི་གདམས་ངག་བླ་མ་ཉིད་ཀྱིས་འགྲོ་མགོན་ཆོས་རྗེ་དང༌། ཐམས་ཅད་མཁྱེན་པ་བུ་སྟོན་ལས་ནོས་པའི་དམར་ཁྲིད་ཀྱི་གདམས་པ་ངོ་སྤྲོད་དང་བཅས་པ་གསེར་སྡིངས་པ་ལས་བརྒྱུད་པའི་ནག་ཁྲིད་དུ་གྲགས་པའི་མན་ངག་རབ་ཏུ་མང་པོ་རྣམས་དང༌། རྒྱ་ཕོ་ལུང་པའི་མན་ངག །བླ་མ་མར་པའི་རིམ་ལྔ་བསྡུས་གསལ་ཕོ་བ་ལུང་པའི་འགྲེལ་པ་དང་བཅས་པ་དང༌། རྔོག་ལུགས་ཀྱི་མཆོག་དབང་གོང་མ་གསུམ་གྱི་ཆོ་ག་དང༌། བླ་མ་བོ་དོང་པ་ནམ་མཁའ་དཔལ་ལས་ནོས་པའི་རྡོ་རྗེ་གདན་གྱི་ནག་པོ་པ་དང༌། བཙུན་མོ་ཅན། མངོན་ཤེས་ཅན་གསུམ་གྱི་གདམས་ངག །འགོས་ཀྱི་ཤོག་དྲིལ་གསུམ་མར་གྲགས་པ་དང༌། བླ་མ་ཚུལ་ཁྲིམས་རྒྱལ་མཚན་ལས་ནོས་པའི་གསང་འདུས་ལུས་དཀྱིལ་གྱི་དབང་བསྐུར་དུ་གྲགས་པ་རྣམས་གསན་ཅིང་བསྒོམས་པས། རྨི་ལམ་སྦྱང་བ་དང༌། སྤེལ་བསྒྱུར་མང་པོ་ནུས་པ་དང༌། འོད་གསལ་དང༌། ཟུང་འཇུག་གི་རྟོགས་པ་ཁྱད་པར་ཅན་རྒྱུད་ལ་འཁྲུངས་སོ། ཡང་དཔལ་དུས་ཀྱི་འཁོར་ལོའི་ངེས་དོན་གྱི་དཀྱིལ་འཁོར་དུ་མཆོག་དབང་གོང་མ་བཞི་ཞུས་ནས་ཟབ་མོའི་ལམ་རྡོ་རྗེ་རྣལ་འབྱོར་སྦྱོར་བ་ཡན་ལག་དྲུག་པའི་ཉམས་ལེན་གྱི་ཁྲིད་བླ་མ་ཉིད་ཀྱིས་འགྲོ་མགོན་ཆོས་རྗེ་ལས་ནོས་པའི་བརྒྱུད་པ་སོ་སོའི་གདམས་ངག་རབ་ཏུ་མང་པོ་དང༌། རྒྱ་གར་གྱི་སྦྱོར་དྲུག་གི་གཞུང་དུ་མ་