[A:༤༢༠]དང༌། དབང་མདོར་བསྟན། དཔལ་ནཱ་རོ་པའི་འགྲེལ་པའི་བཤད་པ་དང་བཅས་པ་དང༌། གྲུབ་ཆེན་སྲོན་ལུང་པའི་མན་ངག་རབ་ཏུ་མང་པོ་དང༌། ཡང་བླ་མ་རིན་ཆེན་དབང་ཕྱུག་ལས་ནོས་པའི་སྦྱོར་དྲུག་དབང་རྒྱལ་ལུགས་སུ་གྲགས་པའི་གདམས་ངག །ཞལ་ཤེས་དང༌། ལག་ལེན་རབ་ཏུ་མང་པོ་དང་བཅས་པ་དང༌། བུ་སྟོན་ཆོས་རྗེ་ལས་ནོས་པའི་སྦྱོར་དྲུག་གི་ཁྲིད་ཡིག་ངོ་སྤྲོད་རྣམས་ཏེ་མདོར་ན་བླ་མ་འདི་ཉིད་ལ་མངའ་བའི་སྦྱོར་བ་ཡན་ལག་དྲུག་པའི་གདམས་ངག་བོད་ལ་བཞུགས་པ་ཕལ་ཆེ་བ་རྣམས་གསན་ཅིང་བསྒོམས་པས་མཚན་མོའི་རྣལ་འབྱོར་གྱི་སྐབས་སུ་ཕྱི་རོལ་གྱི་ཁང་པ་ལ་སོགས་པའི་དངོས་པོ་འགའ་ཞིག་མུན་ཁང་གི་ནང་ནས་གསལ་པོར་མཐོང་བ་ལ་སོགས་པ་གསལ་སྣང་གི་ཡོན་ཏན་གྱི་ཁྱད་པར་འགའ་ཞིག་སྐྱེས་གསུངས་སོ། །གཞན་ཡང་འཁོར་ལོ་བདེ་མཆོག་ལུས་ཀྱི་དཀྱིལ་འཁོར་དུ་དབང་བསྐུར་བ། སྒྲོལ་མ། ཀུན་རིག །ཚེ་དཔག་མེད། གཟུངས་གྲ་ལྔ་རྣམས་ཀྱི་དབང་བསྐུར་བ་ཞུས། རྗེ་བཙུན་ནཱ་རོ་ཏ་པའི་ཐུགས་དམ་མཁའ་སྤྱོད་མའི་བྱིན་རླབས་ཞུས་ནས་དེ་དག་གི་བསྐྱེད་རིམ་གྱི་གདམས་ངག་ཡན་ལག་དང་བཅས་པ་དང༌། རྫོགས་པའི་རིམ་པ་རྩ་དབུ་མའི་མན་ངག་རྣམས་གསན་ནས་ཐུགས་ཉམས་སུ་བཞེས་སོ། །གཞན་ཡང་དཔལ་རྡོ་རྗེ་ནག་པོ་ཆེན་པོ་ལྕམ་དྲལ་དང༌། ཐུན་མོང་མ་ཡིན་པ་ལྷ་བརྒྱད་དང༌། ལས་མཁན་པུ་ཊ་རྣམས་ཀྱི་རྗེས་གནང་བཀའ་བསྒོ་དང་བཅས་པ་དང༌། མགོན་པོ་གདོང་བཞི་པའི་རྗེས་སུ་གནང་བ་རྣམས་ཞུས་ཤིང༌། མན་ངག་རྣམས་རྫོགས་པར་མཛད་དོ། །ཡང་གཙུག་ཏོར་རྣམ་རྒྱལ། ས་ལུགས་ཀྱི་དོན་ཞགས་གཙོ་རྐྱང་གི་རྗེས་གནང་ཆོས་སྐོར་དང་བཅས་པ་དང༌། རྩ་རྒྱུད་བརྟག་པ་གཉིས་པ། བཤད་རྒྱུད་རྡོ་རྗེ་གུར། དཔལ་སམྤུ་ཊ་རྣམས་ཀྱི་ལུང་ཙམ་ཞིག་གསན་ནོ། །ཡང་བླ་མ་ཡང་དགོན་པའི་རི་ཆོས་ཆ་ལག་འགའ་ཞིག་དང་བཅས་པ་དང༌། བླ་མ་ཤངས་པའི་ནི་གུ་ཆོས་དྲུག་ཡན་ལག་དང་བཅས་པ་རྣམས་ཀྱང་གསན་ཅིང་ཐུགས་སུ་ཆུད་པར་མཛད་དོ། །དེ་ལྟར་དགེ་བའི་བཤེས་གཉེན་དམ་པ་རྣམས་བསྟེན་པས་