[A:༤༡༨] ཕྱིས་རྗེ་དཔལ་ལྡན་ཚུལ་ཁྲིམས་པ་ལ་སྟོད་བྱང་པས་གདན་དྲངས་ནས་དགོན་པ་མཁའ་སྤྱོད་ན་བཞུགས་དུས་ཕྱིན་པས་གསུང་ངག་རིན་པོ་ཆེའི་བཀའ་ལུང་ཕལ་ཆེ་བ་ཚར་གཅིག་ཞུས། ཉམས་མྱོང་བཟང་པོ་ཅིག་སྐྱེས་ནས་ཡིད་སྤྲོ་སྟེ་སྒོམ་འཇུར་པོ་བྱས་པས་ཉམས་ཀྱི་སྣང་བ་ཟིན་ཙམ་བྱུང༌། ཡང་ཞི་དགོན་རི་ཁྲོད་དུ་སྤྱན་དྲངས་ནས་ལོ་གཅིག་དང་ཟླ་བ་ལྔ་བཞུགས། ལོངས་སྤྱོད་ཀྱི་ཞབས་ཏོག་ཀྱང་བསམ་གྱིས་མི་ཁྱབ་པ་ཕུལ་ནས་ཞུས་པས། གསུང་ངག་རིན་པོ་ཆེའི་སྨིན་གྲོལ་གྱི་ལམ་ཡོངས་སུ་རྫོགས་པ། གཞུང་ཇི་ལྟ་བ་བཞིན་གྱི་ཁྲིད་ཐད་ཀའི་ཉམས་རྫོགས་པ་ཐོན་ཐོན་གྱི་བར་དུ་བསྒོམས་ཤིང༌། བརྡར་ཤ་བཅད་ནས་ཞུས་པས་མན་ངག་མཐའ་དག་རྫོགས་པར་གནང༌། དེ་དུས་ཀྱེའི་རྡོ་རྗེའི་ལུས་དཀྱིལ་གྱི་དབང་ཞུས་པའི་ཚེ། ལུས་ལ་བདེ་དྲོད་དང་སེམས་ལ་གསལ་སྟོང་གི་ཡེ་ཤེས་ཅུང་ཟད་སྐྱེས། དབང་དེ་ཟིན་པའི་ཚོགས་འཁོར་གྱི་གྲལ་དུ་སྐྱུག་འདོད་པ་ཅིག་བྱུང༌། བསྲན་པས་མ་ཐུབ་ནས་ཁྲག་ཤ་དུད་མདོག་ཅན་ཆེན་པོ་གསུམ་བྱུང༌། དེ་རྗེས་གཞན་དུ་ཕྱིན་ནས་སྐྱུགས་པས་དྲི་ངན་ལ་སྐྱུག་བྲོ་བའི་ཁྲག་མང་པོ་འཐོན། དེ་ཕྱིན་ཆད་སྔར་གྱི་བསྙུང་གཞི་དེ་རྣམས་ལས་གྲོལ་ཏེ་སྐུ་གཟུགས་བཟང་བའི་མཆོག་ཅིག་བྱུང་ངོ༌། །མདོར་ན་བླ་མ་དཔལ་ལྡན་ཚུལ་ཁྲིམས་པ་ཉིད་ཀྱིས། བླ་མ་དམ་པ་བློ་གྲོས་བརྟན་པ་དང༌། འགྲོ་མགོན་ཆོས་ཀྱི་རྗེ་ཉིད་དང༌། གྲུབ་ཆེན་དཀར་པོ་བྲག་པ་རིན་ཆེན་སེང་གེ་གསུམ་ལས་ཇི་ལྟར་གསན་པའི་གསུང་ངག་རིན་པོ་ཆེ་དང་འབྲེལ་པའི་དབང༌། བཤད་པ། ཁྲིད། གེགས་སེལ། མན་ངག་ཕྲ་མོ་ཚུན་ཆད་ཀྱི་བར་ཡོངས་སུ་རྫོགས་པར་ཞུས་པས་དབང་གི་ཆུ་བོ་མ་ནུབ་པ། བྱིན་རླབས་ཀྱི་བརྒྱུད་པ་མ་ཉམས། གདམས་ངག་གི་སརྒ་མ་ལོག་མོས་གུས་ཀྱི་བསམ་པ་ཚིམ་པ་སྟེ་སྙན་བརྒྱུད་བཞིའི་བྱིན་གྱིས་བརླབས་ཤིང་གདམས་པས། བརྗོད་བྲལ་ལྷན་ཅིག་སྐྱེས་པའི་ཡེ་ཤེས་མཚོན་བྱེད་དཔེའི་ཚུལ་དུ་ཐུགས་རྒྱུད་ལ་འཁྲུངས་སོ། །རྗེ་དཔལ་ལྡན་ཚུལ་ཁྲིམས་པས་གསུང་ངག་རིན་པོ་ཆེའི་མན་ངག་ཕལ་ཆེར་རྫོགས་པར་གནང་བའི་སློབ་མ་མང་དུ་ཡོད་ཀྱང༌། ཉིད་ལ་ཇི་ལྟར་མངའ་བ་བཞིན་གྱི་གདམས་ངག་ཕྲན་དང་བཅས་པ་མ་ལུས་པར་