[A:༤༢༤]སྟོན་མོ་ཚུལ་བཞིན་རྫོགས་པར་མཛད་དོ། །དེ་ནས་ཁྲོ་ཕུ་ལོ་ཙཱ་བའི་སྨོན་ལམ་ལེ་བཞི་མ་རྣམས་འདོན་ནོ། །དེ་ནས་དཀོན་མཆོག་གི་སྤྱན་སྔར་ཕྱག་མཆོད་རྒྱས་པ་མཛད་ནས་སྒོམ་ཁང་དུ་ཞུགས་ཏེ། ཀྱེ་རྡོ་རྗེའི་ཕྱི་ནང་གི་བསྐྱེད་རིམ་བསྡུས་པ། ལམ་དུས་སུ་དབང་བླང་བའི་ཆོ་ག་རྣམས་སྔོན་དུ་བཏང་ནས། རླུང་སྦྱོར་དང་གཏུམ་མོའི་དམིགས་པ་གང་རུང་རེ་ཁ་སྤོ་ནས་བསྒོམས་པས་བདེ་དྲོད་དང༌། དེ་ལ་བརྟེན་ནས་ལྟ་བ་རྣམ་པར་དག་པ་ཐུགས་རྒྱུད་ལ་འཁྲུངས་ཤིང༌། དེ་ལ་ཡུན་རིང་དུ་འཇོག་པ་སོགས་ཀྱི་སྒོ་ནས་ནམ་ཕྱེད་ཀྱི་བར་དུ་དུས་འདའ་ནས་མཐར་འཁྲུལ་འཁོར་དང་ལུས་སྦྱོང་མང་དུ་མཛད་དེ་ཉལ་བའི་རྣལ་འབྱོར་ལ་གནས་པར་མཛད་དོ། །དེ་ལྟར་སྐུ་ཚེ་ཁོར་ཡུག་ཏུ་ཐུགས་དམ་འབའ་ཞིག་གིས་དུས་འདའ་ཞིང༌། ཐུན་བར་ལ་གདུལ་བྱ་སྐལ་ལྡན་འགའ་ལ་མན་ངག་ཟབ་མོ་རྣམས་ཏིང་ངེ་འཛིན་སྐྱེས་ཁྲིད་ཀྱི་ཚུལ་གྱིས་གཏན་ལ་འབེབས་པ་སོགས་སྐུ་ཚེ་རང་པ་བཤད་སྒྲུབ་ཀྱིས་དུས་འདའ་བ་ཞིག་གོ །དེ་དག་གི་བར་སྐབས་སུ་མན་ངག་ཟབ་མོ་ཡི་གེར་བཀོད་པ་ཡང་འགའ་ཞིག་ཡོད་དེ། འགྲོ་མགོན་ཆོས་ཀྱི་རྗེ་ལ་གསོལ་བ་གདབ་པ། བླ་མ་དམ་པ་དཔལ་ལྡན་ཚུལ་ཁྲིམས་པ་ལ་གསོལ་བ་གདབ་པ། མཁན་ཆེན་ཤེས་རབ་རྒྱ་མཚོ་བའི་གདུང་མཆོད་དུས་ཀྱི་གསོལ་འདེབས། བླ་མ་དམ་པ་དཔལ་ལྡན་ཚུལ་ཁྲིམས་ཀྱི་རྣམ་ཐར། གསུང་ངག་རིན་པོ་ཆེའི་ཁྲིད་ཡིག་ལམ་འབྲས་གཞུང་བཤད་དང་གེགས་སེལ་གྱི་ཟིན་བྲིས། འཆི་ལྟས་བརྟག་པའི་གདམས་ངག་ཚིགས་བཅད་མ། གྲུབ་ཆེན་བཅུ་དང་ཕྲ་མོ་བརྒྱད་ཀྱི་ཞལ་ཤེས། ཕྲིན་ལས་སོ་གཉིས་ཀྱི་སྡོམ་ཚིག །སྦྱོར་དྲུག་གི་ཁྲིད་ཡིག་སྲོན་ལུགས་ཀྱི་རླུང་སྦྱོར་སོགས་ཀྱི་ཟིན་བྲིས། དབང་རྒྱལ་ལུགས་ཀྱི་སྦྱོར་དྲུག་གི་ཞལ་ཤེས་ཡི་གེར་བཀོད་པ། ཁྲིད་ཞུ་སྤྱི་ལ་གདམས་པ། ཚེ་སྒྲུབ་ཀྱི་མན་ངག །དབུ་མའི་གཞི་ལམ་འབྲས་གསུམ་རྣམས་མཛད་དོ། །དགུང་ལོ་བདུན་ཅུ་དོན་གཅིག་པ་བྱི་བའི་ལོ་ནག་པ་ཟླ་བ་ལ་བདག་གིས་རྗེ་ཉིད་ཀྱི་དྲུང་དུ་སླེབ་སྟེ། དེ་དུས་སྒོམ་ཆེན་པ་ཅིག་གིས་བློ་སྦྱོང་ཞུས། དོན་དམ་བྱང་ཆུབ་ཀྱི་སེམས་ཀྱི་སྐབས་སུ་ཞི་གནས་བསྒོམ་དུ་བཅུག་པས་རྣམ་རྟོག་ཁེགས་མ་ནུས་པ་ཅིག་བྱུང་བ་ལ་བསམ་གཏན་གྱི་བག་