[A:༤༢༣]དྲུག་པའི་སོར་སྡུད་ཀྱི་ཏིང་ངེ་འཛིན་ཇི་ལྟ་བ་བཞིན་སྐྱེ་ཡིན་འདུག་པས་ལུས་གནད་སྦྱོར་དྲུག་བཞིན་བྱས་གསུངས། དེ་ནས་ཚེ་དཔག་མེད་ཀྱི་རྣལ་འབྱོར་མཛད་དེ། མདུན་དུ་ཚེ་དཔག་མེད་བསྒོམས་ནས་གཟུངས་བརྒྱ་རྩ་རེ། སྔགས་ཐུང་བ་ལྔ་བརྒྱ་རེ་བཟླ་བར་མཛད་དོ། །དེ་ནས་དཔལ་ཀྱེ་རྡོ་རྗེའི་བསྐྱེད་རིམ་ཡན་ལག་དྲུག་པ་ལུས་ཀྱི་དཀྱིལ་འཁོར་དང་བཅས་པ་བསྒོམས་ནས་ལམ་དུས་ཀྱི་དབང་རྒྱས་པ་རེ་ལེན། དེ་ནས་དབང་བཞི་བསྡུས་པའི་ལམ་ཁྱད་པར་ཅན་བཞིའི་ཉམས་ལེན་རྫོགས་པ་མཛད། དེ་ཡང་ལོ་ཁ་ཅིག་ལྟ་བ་བསྐྱང་བ་གཙོ་བོར་བྱས། རྗེས་ལ་རླུང་གཏུམ་མོ་བསྐྱེད་རིམ་གསུམ་ལ་གཙོ་བོར་བྱས་གསུངས། རྗེས་ལ་བཟླས་པ་ལ་ཨཥྟ་བརྒྱ་ལྔ་བཅུ་རེ་བཟླས་ནས་དཀྱིལ་འཁོར་བསྡུས་ནས་བསྔོ་བ་སོགས་རྫོགས་པར་མཛད་དོ། །དེ་ནས་སྒོམ་ཁང་ནས་ཐོན་ནས་ལམ་འབྲས་བརྒྱུད་པའི་ཕྱག་འཚལ། དཀར་གཏོར་ཆ་བཞི། ཛམྦྷ་ལའི་ཆུ་སྦྱིན། དབྱུ་གུ་མ་དང་མི་གཡོ་བ་དྲུག་ཅུ་རྩ་བཞི། སྒྲོལ་མ་ཉེར་གཅིག་ལ་གཏོར་མ་བརྒྱ་རྩ། ཐུགས་རྗེ་ཆེན་པོའི་བྲུལ་གཏོར་ཆ་གསུམ་ཁ་དོན་མང་དུ་མཛད་དེ། ཁ་ཟས་ཀྱི་རྣལ་འབྱོར་དང་ལྡན་པས་ཟས་ལ་ལོངས་སྤྱོད། མཐར་མདོ་དང་བསྔོ་བ་མང་དུ་མཛད་ནས་མན་ངག་བསྒོམ་པ་རྣམས་བསྐོར་བ། དམིགས་པ་སྤོར་བ་ཆོས་གསུང་བ་སོགས་མཛད་དོ། །དེ་ནས་བདེ་མཆོག་དྲིལ་བུ་པའི་བསྐྱེད་རིམ། འཇམ་དབྱངས་ཨ་ར་པ་ཙ་ན། སྒྲོལ་མ་ཚར་ཉེར་གཅིག་རེ། ཁྲོ་ཕུ་ལོ་ཙཱ་བའི་སྨོན་ལམ་རིན་པོ་ཆེའི་ལྗོན་ཤིང་རྣམས་མཛད་དོ། །དགུང་ཐུན་ལ་བབ་པ་ན། དཔལ་ཀྱེ་རྡོ་རྗེའི་མངོན་རྟོགས་བསྡུས་པ་ལུས་དཀྱིལ་ལམ་དུས་ཀྱི་དབང་བསྡུས་པ་དང་བཅས་པ་རྩ་སྔགས་ཕྱེད་དང་ཉིས་བརྒྱ་རེ་དང་བཅས་པ་དང༌། ཀུ་རུ་ཀུལླེ། སེང་གེ་སྒྲ། ཁྱུང་ཁྲ། ནཱ་རོ་མཁའ་སྤྱོད་རྣམས་ཀྱི་སྒོམ་བཟླས་རེ་མཛད། སྤྱོད་འཇུག་གི་བསྔོ་བའི་ལེའུ་ཚར་རེ་མཛད་དོ། །དགོངས་ཐུན་ལ་བབ་པ་ན་དཔལ་ཀྱེ་རྡོ་རྗེའི་བསྐྱེད་རིམ་རྫོགས་པ། ལམ་དུས་ཀྱི་དབང་རྒྱས་པ་རྩ་སྔགས་བརྒྱ་རྩ་རེ་དང་བཅས་པ་སྔོན་དུ་བཏང་ནས་མདུན་བསྐྱེད་སྒྲུབ་ཅིང་མཆོད་པ། གཏོར་མ་དང་པོ་ཀྱེ་རྡོ་རྗེ། གཉིས་པ་བདེ་མཆོག །གསུམ་པ་ནཱ་རོ་མཁའ་སྤྱོད་རྣམས་ལ་ཕུལ་ནས། ཆོས་སྐྱོང་ཆེ་ཆུང༌། པུ་ཊ་རྣམས་ཀྱི་གཏོར་མ་རྒྱས་པ་དང༌། དཔའ་བོའི་