[A:423]drug pa'i sor sdud kyi ting nge 'dzin ji lta ba bzhin skye yin 'dug pas lus gnad sbyor drug bzhin byas gsungs/ de nas tshe dpag med kyi rnal 'byor mdzad de/ mdun du tshe dpag med bsgoms nas gzungs brgya rtsa re/ sngags thung ba lnga brgya re bzla bar mdzad do/ /de nas dpal kye rdo rje'i bskyed rim yan lag drug pa lus kyi dkyil 'khor dang bcas pa bsgoms nas lam dus kyi dbang rgyas pa re len/ de nas dbang bzhi bsdus pa'i lam khyad par can bzhi'i nyams len rdzogs pa mdzad/ de yang lo kha cig lta ba bskyang ba gtso bor byas/ rjes la rlung gtum mo bskyed rim gsum la gtso bor byas gsungs/ rjes la bzlas pa la aShta brgya lnga bcu re bzlas nas dkyil 'khor bsdus nas bsngo ba sogs rdzogs par mdzad do/ /de nas sgom khang nas thon nas lam 'bras brgyud pa'i phyag 'tshal/ dkar gtor cha bzhi/ dzambha la'i chu sbyin/ dbyu gu ma dang mi g.yo ba drug cu rtsa bzhi/ sgrol ma nyer gcig la gtor ma brgya rtsa/ thugs rje chen po'i brul gtor cha gsum kha don mang du mdzad de/ kha zas kyi rnal 'byor dang ldan pas zas la longs spyod/ mthar mdo dang bsngo ba mang du mdzad nas man ngag bsgom pa rnams bskor ba/ dmigs pa spor ba chos gsung ba sogs mdzad do/ /de nas bde mchog dril bu pa'i bskyed rim/ 'jam dbyangs a ra pa tsa na/ sgrol ma tshar nyer gcig re/ khro phu lo tsA ba'i smon lam rin po che'i ljon shing rnams mdzad do/ /dgung thun la bab pa na/ dpal kye rdo rje'i mngon rtogs bsdus pa lus dkyil lam dus kyi dbang bsdus pa dang bcas pa rtsa sngags phyed dang nyis brgya re dang bcas pa dang / ku ru kulle/ seng ge sgra/ khyung khra/ nA ro mkha' spyod rnams kyi sgom bzlas re mdzad/ spyod 'jug gi bsngo ba'i le'u tshar re mdzad do/ /dgongs thun la bab pa na dpal kye rdo rje'i bskyed rim rdzogs pa/ lam dus kyi dbang rgyas pa rtsa sngags brgya rtsa re dang bcas pa sngon du btang nas mdun bskyed sgrub cing mchod pa/ gtor ma dang po kye rdo rje/ gnyis pa bde mchog /gsum pa nA ro mkha' spyod rnams la phul nas/ chos skyong che chung / pu Ta rnams kyi gtor ma rgyas pa dang / dpa' bo'i