[A:41a]can mthong ba'i tshe/ mchod pa'i khyad par dang bcas pas gsol ba btab na rnal 'byor dbang phyug gis ston zhes rje nyid kyis gsung ngo / /bla ma la gus pa la bla ma yab sras nges par rdo rje'i 'chang yin pa la the tshom mi mnga' bar/ zhal bzhugs pa na sku gsung thugs ji ltar mnyes pa bzhin bsgrubs nas/ tha na kyal ka'i phyir yang gsung ma bzlog sku 'da' ba'i tshe yang bdag nyid glud du gtong ba'i bar du mdzad/ sku 'das pa na/ ci yod bla ma'i phyir du gtong / dngos rdzas la 'dzin pa med pa ni/ chos 'khor yang rim pa gsum mdzad/ rgyun du dge 'dun brgya phrag re la tshugs btsugs/ dbu rtse rnying mar grags pa'i gtsug lag khang 'di bzhengs/ bla ma dkon mchog rgyal po'i nang rten gser gyi gdung khang / bla ma sa chen gyi nang rten bkra shis sgo mang / slob dpon rin po che dang gcung gi nang rten gser sku rnams bzhengs/ de dag gi drung du mar me mtshan thub brgya rtsa btsugs/ chen po la 'os pa'i gdugs dang rgyal mtshan/ bla bre chen po dang / dril bu'i gdung ring gdung khebs la sogs mang du phul/ rin po che'i mdo mang dang rgyud 'bum la sogs pa bka' 'gyur phal cher gser las bzhengs nas gsung sgrogs rgya cher mdzad/ phyag tu 'bul ba byung ba'i rin po che dang dkar po 'dres pa'i 'bum cha sum brgya lhag pa byung ba la/ brgya phrag gcig bla ma gong ma'i gdung gi drung gtsug lag khang 'dir phul/ gzhan rnams bstan pa rgyas par bya ba'i phyir gtsug lag khang gzhan dang dge bshes du ma'i phyag tu phul/ gzhan yang