[A:37b]la/ /shes nas dad pa thob pa'i rjes 'brang bdag /gdul byar bcas pa 'bral med bskyab tu gsol/ /zhes pa'i gsol 'debs kyang shugs 'byung du bgyis pa lags/
grags pa rgyal mtshan/
de'i gcung rje btsun rin po che grags pa rgyal mtshan ni/ yab dgung lo nga drug bzhes pa'i dus me mo yos bu'i lo smal po zla ba'i tshes bco brgyad la 'khrungs so/ /'di'i rnam par thar pa brjod na/ skye ba brnyes pa'i khyad par/ bslab gsum gyi yon tan brnyes tshul/ 'phrin las mdzad tshul/ lung bstan dang skye ba dran pa'i tshul bzhis rtogs par bya'o/ /dang po ni/ skye ba bzhes pa na klu'i rgyal po'i tshul du yum la rmi lam bstan nas bkra shis pa'i ltas dang bcas te sku bltams zhing / smra shes nas dben pa la dga' zhing brkam chags med pa'i yon tan sgrub pa la brtson pa/ byis pa'i spyod pa las 'das pa zhig tu gyur to/ /gnyis pa ni dgung lo brgyad lon pa na byang sems zla ba rgyal mtshan la tshangs spyod kyi dge bsnyen nod de/ de tshun chad 'phral rab tu byung ba bas btsun zhing / mnyes kyang rab tu byung ba la mnyes/ 'khor dge slong kun la gso sbyong ma chag par mdzad de/ /ja ni bdag 'dren gsungs nas khong rang yang pha tshad nas gzigs/ gzhan yang skye ba snga ma'i dge slong gi bag chags kyi cha chos gsol tsa na/ thugs yang ba'i dus su nga'i 'di la byin len ma byas snyam pa 'byung / mchod pa'i dus su dam tshig rdzas tsam las ye mi gsol ba cig dang po byung / ji zhig tsa na dum re gsol/ de bzhin mdzad pa ci lags byas pas/ nga la dang po chang la 'dod 'dun drag po rmi lam tshun chad du