[A:313b]gtsang khams gsum/ stod mnga' ris dang bcas pa'i gang du phebs pa dang bzhugs pa'i gnas thams cad du grub pa'i mdzad pa ya ma zung kho nas dus 'da' zhing / 'gro ba rnams kyi mgon skyabs dam pa mdzad bzhin pa da lta dgung lo zhe gnyis pa'i steng na bzhugs pa 'di yin no/ /'di'i gcung zhig gzhon nu la gshegs/ de'i gcung ngag dbang kun dga' dbang rgyal ni/ yab rje chos kyi rgyal po dgung lo sum cu bzhes pa chu pho 'brug gi lo la dpal sa skya'i bla brang phun tshogs gling du 'khrungs shing / gzhon nu nyid nas yon tan gyi ma mo 'dri klog sogs la sbyangs/ 'jam pa'i dbyangs sku mched dang / rje thar rtse nas nam mkha' dpal bzang sogs las gsan pa rgya cher mdzad/ bde kye phur pa sogs kyi dus dang grangs kyi bsnyen pa mthar phyin pas mtshan ma ngo mtshar can mang du brnyes shing / dgung lo nyer brgyad bzhes pa tshun chad du bstan pa dang sems can gyi don ci rigs pa mdzad nas/ nyer dgu pa sa ga zla ba'i yab rje chos kyi rgyal po'i dus chen thog tu gzhi thog bla brang du ngo mtshar ba'i ltas du ma dang bcas zhi bar gshegs so/ /de nas nged rang gis kye rdo rje la brten nas sku gdung rin po che'i zhabs tog tshul bzhin du bgyis te/ lo ngo gsum gyi bar du mchod pa rgya chen po dang bcas sku gdung ril por bzhugs shing / de nas khyi lo bzhu 'bul gyi zhabs tog bgyis nas/ gdung rus rnams 'jam dbyangs/ slob dpon padma/ tshe dpag med/ mchod rten brgya tsam la sogs pa'i gdung tsha mang du bsgrubs nas sngags 'chang grags pa'i mtshan can gyi sku