[A:312b]gsal ba'i bstan bcos tshogs chen mor nyi ma gsum gyi bar du gsungs pas kun gyi yid 'phrog par gyur/ de dus dbus gtsang mnga' ris dang bcas pa'i sde dpon rigs rnams kyis khri ston gyi 'bul nod bsam gyis mi khyab pa nyin re bzhin yang bgrang ba las 'das pa char bzhin du babs pas/ de dus kyi dpal 'byor longs spyod de tsam rgan rabs sus kyang mi dran par grags/ rje de nyid kyis slar yang rje mus pa chen po rdo rje 'chang sangs rgyas rgyal mtshan gyi drung du rab tu byung zhing zab chos mang du gsan/ de nas khams phyogs kyi sa skya pa'i bstan pa'i rtsa ba sa dkar 'dab 'dob kyi dgon mchod gzhis dang bcas pa'i zhal bdag mdzad par shar phyogs su chibs kyi kha lo bsgyur te/ bdag chen kun dga' legs pa dang dges bzhin du mjal/ de nas sga gser kha/ dar rtse mdo sogs su gzhan phan rgya cher mdzad nas/ slar 'jam dbyangs sku mched sogs mjal ba la dbus gtsang phyogs su chag phebs te/ dpal ldan sa skyar yun mi ring ba zhig bzhugs nas/ slar yang shar phyogs la chibs kha bsgyur te/ bdag chen kun dga' legs pa nyid zhing brje la khad dang mjal bas skabs zos par byung / de dus bdag chen pa'i gsung gis sngar yan chad nyi ma khams phyogs kyi sa skya pa'i bstan pa nged khu dbon rnams kyis bzung ba de yin/ da phyin chad khams phyogs 'di'i sa skya pa'i bstan pa'i chags 'jig gdung brgyud mthu stobs pa khyed la rag las pas sems khur che bar byed dgos zhes pa'i bka' stsal phebs nas de ma thag dag pa'i zhing du gshegs so