[A:312a]yab gcig sngags 'chang bla ma khyed/ /mi mngon dbyings nas dgongs pa rdzogs gyur na/ /rang gzhan 'di phyi'i don chen 'grub snyam pa/ /'di tsam kho na sems kyi ngal gso'i gnas/ /sangs rgyas kun las lhag pa'i bka' drin can/ /mkhyen brtse nus ldan rtsa ba'i bla ma rnams/ /gcig tu 'dus pa sngags 'chang grags pa'i mtshan/ /gsol ba 'debs so don kun lhun grub stsol/ /zhes pa'ang rang babs su smras shing gsol ba btab pa'o/ /de lta bu'i sngags 'chang bla ma grags pa'i mtshan can de nyid kyis byang phyogs kyi sa skyong chen po'i lcam mo la sras bsod nams rgyal mo zhes bya ba khab tu bzhes pa la/ sras lcam sring drug 'khrungs pa'i lcam sring gnyis gzhon nu la gshegs shing / sku mched gsum gegs mang du byung ba'i 'jam dbyangs mthu stobs dbang phyug grags pa rgyal mtshan dpal bzang po zhes bya ba ni/ yab sngags 'chang grags pa'i mtshan can nyid dgung lo nyer drug bzhes pa sa pho byi ba'i lo la gdan sa chen por sku 'khrungs/ sku gzhon nu nas yon tan gyi rtsa ba 'bri klog sogs tshegs med du mkhyen cing / thugs gsal ba mthar thug pas kun gyi yid 'dzin pa la mkhas pa zhig yin no zhes thos la/ de de'i skabs nas rje btsun 'jam pa'i dbyangs sku mched/ thar rtse nas nam mkha' dpal bzang sogs las yab chos mtha' dag gsan cing / dgung lo bcu gsum pa la nged rang sku mched gsum lhan cig tu chos khri chen mor rgyal tshab tu mnga' gsol zhing / rje nyid kyis thub pa'i dgongs pa