[A:311b]bzhes pa snyam byed pa'i mod la gnyid sad byung bas/ yab rje chos kyi rgyal po de nyid la bcos ma ma yin pa'i dad pa snying thag pa nas skyes te/ de'i skabs su gsol 'debs kyi yi ge bsam pa lhun grub ces bya ba de yang brtsams pa lags so// //'dir smras pa/ phyi ltar sngags 'chang gos dkar lcang lo can/ /nang ltar rgyal ba rab 'byams 'dus pa'i dngos/ /gsang ba rang sems ye shes ngor bzhugs pa'i/ /yab rje chos kyi rgyal por snying nas dad/ /gang sku gangs ri'i spo ltar lhun chags shing / /zla rgyas bzhin ras 'dzum pa'i mdangs gsal ba/ /lan gcig min par yang yang yid la gcags/ /de 'dra dran pas snying nas gdung bas 'dud/ /gang gsung mchog dman skye bo'i tshogs kun gyi/ /gang zag skyon nas gsung ba zhabs drung du/ /rtag tu gnas pa kun gyis ma thos pa'i/ /de 'dra'i gsung gi yon tan dran bzhin 'dud/ /gang thugs dgra gnyen bar ma'i 'gro rnams la/ /byams sdang khyad med 'byongs pa'i sems dpa' che/ /sa skya'i sde dang bstan pa rgyas pa'i thabs/ /gcig tu dgongs pa'i thugs de bsam gyin dad/ /mgon khyod zhing gzhan gshegs pa'i tshul bstan kyang / /sras kyi tha chung bdag la thugs brtse bas/ /rmi lam ngang du zhal gyi dkyil 'khor mchog /rgyun chad med par bstan pas spro ba 'phel/ /bdag cag lugs gnyis blo gros mig bral zhing / /gong ma'i mdzad 'phrin rgyun bzang skyong dka' bas/ /be 'u 'i phrag par glang chen khur bor ltar/ /bstan pa'i khur gyis lus sems mnar mod kyang / /rgyal ba'i