[A:311a]bde mchog gi dkyil 'khor rdul tshon ma bzhengs te sgrub mchod yun ring du 'bul ba sogs dang / mdor na rang gi lus longs spyod thams cad rje btsun bla ma thugs rje can de nyid kyi dgongs pa rdzogs thabs su ci 'gyur gyi thabs la 'bad rtsol bgyid blo mi dman tsam yod pa 'di lags/ de lta bu'i sngags 'chang sprul pa'i skyes mchog mkhyen brtse nus pa'i mnga' bdag 'brel tshad don dang ldan nges pa de nyid gdul bya gzhan gyi snang ngor thun mong du snang ba'i gzugs sku chos dbyings su bsdus pa'i tshul bstan mod kyang / las dag pa'i gdul bya rnams kyis gsol ba btab na rgyun chad med par zhal bstan nas byin gyis rlobs par nges te/ bdag nyid chen po'i slob bu'i tha chung kho bo lta bu la yang dus phal cher du rmi lam du gsal bar mjal ba dang / lhag par byi lo zla ba bcu pa'i tshes drug gi tho rangs rmi lam du yab rje chos kyi rgyal po de nyid gzhi thog bla brang gi rab gsal shar ma na bzhugs khri mtho ba zhig gi steng zhal nub tu gzigs nas bzhugs 'dug pa'i sku mdun na rgya ja sogs dngos po mang du 'dug pa la/ nged rang la spyan gyis gzigs nas dges pa'i mdangs bsam gyis mi khyab pa zhig mdzad de/ sku mdun gyi dngos po rnams la 'di rnams la tho rgyab yod do gsungs nas nged rang la stsal ba snyam byed cing / lhag par sems thog na yod pa'i dogs pa shin tu che ba zhig la 'di ltar gyis shig pa'i bslab bya lhug stsol du gnang byung ba la/ rjes su yi rang ba'i tshig mang du zhus shing / slar yang dus rtag tu rtse bas skyong bar zhal gyis