[A:309a]'phags pa la byang sems kyi zil pa phrom me bar gyur te/ nyid kyi sku'i skye ba snga mar gyur pa'i sprul pa'i sku dpal ldan bla ma dam pa bsod nams rgyal mtshan dpal bzang po zhes bya ba nyid dga' ldan chos kyi pho brang na rgyal ba byams pa'i zhabs drung na bzhugs pa'i gnas der slar yang byon par gyur to/ /de ltar dbu thod 'phags pa dang dus mnyam du shangs las byang sems dkar dmar gyi rgyun shin tu bungs che ba babs te sku gdung gi mdun gyi na bza' thams cad tshos par gyur cing / 'di ni rnal 'byor pa rang kha ba zhig yin kyang 'chi khar grub mtha' bsnyogs pa'i thun mong ma yin pa'i rtags su bshad de/ rje sa skya pa chen po'i gsung rab 'khor lo bde mchog gi rim bzhi lam bslang zhes bya ba'i bstan bcos las/ chos kyi sku la chos skur ngo shes pa/ 'chi kha nyid du phyag rgya chen po mchog gi dngos grub thob nas/ rnam shes spyi gtsug tu song ste longs spyod rdzogs pa'i sku'i zhing khams su 'gro bar 'gyur ro/ /de'i rtags pha'i khu ba'i thig le sna bug g.yon na mar 'byung ngo zhes gsungs pas so/ /de nas sku gdung gi zhabs tog rnams rgyud sde nas bshad pa ltar phul te/ rje btsun gcen gyis yi dam rdo rje phur pa la brten nas bzhu 'bul mdzad pa'i tshe/ nam mkha' la 'ja' 'od kyi phreng ba rab tu 'khrigs pa dang me tog gi char kha ba ltar bab cing / khyad par gdan sa chen po'i rgyab ri dpon po ri phyogs nas 'ja' 'od sna lnga pa zhig lho phyogs su thal gyis song nas gzhi thog tshoms dmar gyi sku gdung bzhu la bzhen pa'i bar snang gi thad tsam du