[A:306a]mdzad pa'i dus gsum rgyal ba kun gyi spyi gzugs chen po sngags 'chang bla ma rgyal sras sbas pa'i rnal 'byor mtshungs pa med pa de nyid kyis zhing 'dir bstan pa dang sems can gyi don grangs dang tshad med pa zhig mdzad pa rnams la thugs shin tu rangs par gyur cing / dus ngan gyi skye bo khrel med pa dag gi spyod ngan sna tshogs gzigs pas thugs cung zad gdungs par yang gyur te/ 'jig rten gyi khams gzhan du gdul bya rgya che ba la dgongs pa'i tshe/ de'i snga ltas su sa'i dkyil 'khor 'di yang yang yang du g.yo zhing / nam mkha' nas lha rnams kyis rol mo'i sgra dbyangs lan mang du sgrogs pa dang / gzhan yang dus mtha'i rlung chen langs pa lta bu'i yid du mi 'ong ba'i rlung dmar chen pos lung pa thams cad khyab ste/ nyi ma'i 'od zer kyang mog mog por byed pa zla ba du ma'i bar du byung zhing / de lta bu'i skabs shig na dngos cag gzhi thog bla brang gi mkha' spyod na bsdad pa'i skabs tho rangs shig rmi lam du/ sngags 'chang bla ma nyid sku sham skya 'jol le ba dang bcas rtab pa'i tshul gyis byon byung nas/ nged ni bde ba can la 'gro khyed rang e 'gro gsung byung ba la/ 'di bzhin gyi rigs sngon gyi bla ma gong ma 'ga' zhig la yang byung 'dug pa la legs rgyu ma byung 'dug pa'i tshul dran nas/ bdag ni mi 'gro lags zhus pa snyam byed pa dang gnyid sad byung bas yid kyang ma bde zhing / de dus yab rje chos kyi rgyal po nyid 'khor lo bde mchog gi gsung bsnyen kha gso la bzhugs pa'i dus yin pas/ nyin mo gsol ba tshogs 'khor gyi skabs su rang la rmi