[A:306b]lam byung tshul rnams zhus nas/ deng sang sku dog bzhin ni yod pa min lags sam zhus pas/ he he bde ba can du 'gro na tshang 'dug pa/ gang ltar da nang tho rangs nged kyi rmi lam na yang lus la ras gos shig min pa gzhan gang yang med pa byas/ bande zhig gi kha la rgya gling gnyis sbyar nas 'bud kyin 'dug pa la mi gnyis kyis bus pa 'dra ba'i skad tshad ma yong gin 'dug pa de dang bsdebs nas bde mchog chu mig rdzing kha'i ri sul na yar 'dzegs phyin pa'i rmi lam zhig byung gsungs shing / de dag gi rjes tsam bdag cag ngam ring rgyal po'i pho brang na yod pa'i skabs shig thugs dam gsung shog gnang ba zhig gi nang na yang / ngos ni nyer dgu'i zla bar 'dug sa skya pa'i bstan pa la gdan sa'i 'dzin skyong 'di las gal che ba mi 'dug pa/ sems khur bskyed pa rang gal che zhes gsung ba 'dug pa de dus ni rang nyid rtag 'dzin ches pas go ba ma byung kyang / phyis bsams pas sngags 'chang bla ma nyid myur du dag pa'i zhing du phebs pa'i gsung de dus nas stsal bar 'dug go
/de nas rje nyid dgung lo lnga bcu nga lngar phebs pa'i me mo sbrul gyi lo'i zla ba dang po tsam nas gzhan snang du sku bsnyung ba'i tshul bstan pa na/ spyi sgos tha dad nas sku rim rgya chen po bsgrubs shing / 'tsho byed mkhas pa rnams kyis kyang 'phrod rten rim par phul kyang sku la gdangs khyad du mngon pa gtan nas ma byung bas/ thams cad sems yed yed por gyur pa'i tshe/ nyid kyi gsung las/ da lo nged la dog cha chen po yod nyen 'dug kha rtsang zla ba bcu gnyis pa'i tho rangs kyi cha zhig la skad