[A:303a]chen po'i phyag gi thod pa'i nang nas dam rdzas brgya rdo rlon pa bdud rtsi'i rgyun 'dzag bzhin pa zhig phyag tu babs byung ba na/ the tshom med pa rje nyid dgung lo nyer lnga bzhes pa'i dus dam rdzas kyi sgrub pa thog ma mdzad pa na/ nam mkha' shin tu 'jam pa la me tog gi char dang 'ja' 'od kyi gur khang 'khrigs pa/ dri bzang gis sa skya'i lung pa khyab pa sogs phyi rol du ngo mtshar ba'i rtags du ma byung zhing / nang du yang dam rdzas 'phel stobs che ba sogs gegs med du mthar phyin pa yin no zhes thos la/ de nas bzung ste rang nyid dgung lo nga gsum bzhes pa yan chad du lo gcig gnyis tsam ma gtogs rnal 'byor dbang phyug grub pa brnyes pa'i dus chen sa ga zla ba byung re bzhin gyi dam rdzas 'chi med ril bu'i sgrub pa rgyun mi chad par mdzad pas 'di nyid kyis 'phrin las kyi sgo nas bstan pa dang sems can gyi don bsgrub pa la bdag nyid chen po 'di las ngo mtshar che ba sngon chad gangs can gyi khrod 'dir bstan 'dzin gyi skyes bu gzhan su yang ma byung ba yin la/ zang zing gi sbyin gtong rlabs po che'i sgo nas sems can gyi don mdzad pa yang rje btsun sa skya pa'i gdung rabs dri ma med pa sngon gyi dus su byon pa'i chos kyi rgyal po 'phags pa rin po che dang / dpal ldan bla ma dam pa sogs kyi rnam thar dang mthun par rang nyid kyi yab yum sogs kyi dgongs rdzogs rgya chen po sgrub par mdzad pa dang / khyad par dga' ston du ming btags pa'i dge 'dun dang skye bo'i tshogs khri phrag tu longs pa la mang ja/ gdan non/ 'bru'i phung po ri bo ltar spungs pa'i