[A:302b]par rdzogs su zin kyang / phyi rol du sbas pa'i rnal 'byor gyi tshul du kho bo ni yon tan thams cad dang bral ba'i za nyal 'chag gi rnal 'byor pa yin no zhes khengs bskyung ba'i tshig kho na rgyun ldan du gsungs shing / rtag tu rang nyid dman cha bzung nas/ gzhan rnams mchog tu gzigs pa'i sngon gyi skyes bu dam pa rnams kyi rnam thar dang mthun pa'i mdzad pa kho na phyag bzhes su bstar ba ni bdag nyid chen po 'di'i thun mong ma yin pa'i ngo mtshar ba'i rnam par thar pa yin la/ des na deng sang gi skabs 'dir dgas po bka' brgyud pa'i bstan 'dzin du rlom pa 'ga' zhig sogs lugs gnyis dang 'gal ba'i gang dran tho cho'i spyod pa 'ba' zhig dus rgyun du byed pa la rang nyid kyang grol bar rlom zhing / col chung rnams kyang grub thob tu 'dzin pa'i bstan pa dang sems can la phan pa'i gnas skabs dus nam yang cung zad kyang med pa'i mi tshe stong zad mkhan rnams kyi snang tshul mthong ba'i tshe/ bdag gi bla ma sems dpa' chen po grags pa'i mtshan can de nyid kyi rmad du byung ba'i mdzad ba'i cha shas re re tsam la bsams na yang / sems yod dag dad pa'i spu long ches cher g.yo bar nges te/ nyid kyis ci mdzad thams cad bstan 'gro'i don du gyur pa kho na las gzhan du cung zad mi snang ba'i phyir ro/ /de lta bu'i skyes bu chen po de nyid kyis rdo rje theg pa'i nyams len byed pa'i gdul bya rnams la phan par dgongs nas/ dam rdzas 'chi med ril bu'i sgrub pa mdzad par bzhed de/ sgo rum ye shes mgon po'i drung du de ltar mdzad na legs nyes kyi lung bstan zhu bar mdzad pa'i tshe/ bse mgon