[A:302a]pa la dar tsam cig nas/ bya rog cig skad snyan po sgrogs bzhin pa dang bcas da lta mchod rten yod pa'i gdong nag gi ri chung 'di'i khar babs nas brag la mchu yang yang 'dzugs shing skad du ma sgrog gin 'dug pa la/ bdag nyid chen po'i gsung gis bla ma gong ma rnams kyis lo dgra'i kha gnon du 'debs par mdzad pa'i rigs gsum mchod rten gyi thes ro de bya rog babs sa ya gi na yod par 'dug pas/ rang re rnams myur du 'gro ba yin gsungs nas chag phebs pa'i tshe/ ji ltar bka' stsal pa bzhin sngar gyi bya rog babs pa'i shul na mchod rten gsum gyi bum ldir yan zhig pa'i bang rim dang / seng khri man gyi rtsig pa shin tu gsal ba 'dug pa mthong ba'i tshe/ zhabs 'bring ba kun ha las par gyur cing / de nas sa yul der da lta'i rigs gsum mgon po'i mchod rten 'di legs par bzhengs nas phyag nas bkra shis mnga' gsol mdzad pa nas bzung / da lta'i bar du phyogs de nyid nas ser ba sogs kyi rgyun 'byung ba gtan med du gyur pa ni/ gdan sar gnas pa'i skye bo kun gyi blo yul du gsal ba 'di yin no/ /don gyi dbang de dag gi phyir 'di skad ces bstod de/ /dus gcig dpal ldan sa skya'i mdun ri'i sner/ /lo dgra gzhom phyir rigs gsum 'debs bzhed de/ 'das dus gong ma'i btab shul btsal ba'i tshe/ /srung ma'i sprul pas dngos su bstan la 'dud/ /ces so/ /de ltar sngags 'chang bla ma lung dang rtogs pa'i mnga' bdag chen po 'di nyid ni/ nang du spangs rtogs kyi yon tan ma lus shing lus pa med